کمارسوامی نے اقلیتوں کو کبھی نظر انداز نہیں کیا: جنتادل (ایس)
بنگلورو،18؍اگست(ایس او نیوز) جنتادل (ایس) کے قومی جنرل سکریٹری محمد ظفر اﷲ خان نے وزیراعلیٰ ایچ ڈی کمارسوامی پر عائد الزامات کو بے بنیاد قرار دیا ہے کہ ریاستی حکومت اقلیتوں کو دانستہ طور پر نظر انداز کررہی ہے۔
اخباری نمائندوں سے بات چیت کرتے ہوئے انہوں نے کہاکہ کچھ شرپسند عناصر اس قسم کی خبریں اچھال رہے ہیں۔انہوں نے کہاکہ وزیر اعلیٰ ایچ ڈی کمار سوامی ایک پارٹی یا ایک فرقے تک محدود نہیں ہیں بلکہ ریاست کے عوام کے لئے بلاامتیاز وہ وزیراعلیٰ ہیں۔
انہوں نے کہا کہ بھلے ہی اسمبلی انتخابات میں جنتادل (ایس) کو مسلمانوں سے متوقع تائید نہ ملی ہو اس کے باوجود بھی وزیر اعلیٰ نے کبھی مسلمانوں کو نظر انداز نہیں کیا۔ انہوں نے کہاکہ جنتادل (ایس) ایک سیکولر سیاسی جماعت ہے جو تمام مذاہب کا یکساں احترام کرتی ہے۔
ریاستی کابینہ میں جنتادل (ایس) کی طرف سے کسی مسلمان کو موقع نہ دئے جانے کی شکایت پر انہوں نے کہا کہ کابینہ میں توسیع کے مرحلے میں ایک مسلمان کو ضرور موقع دیا جاسکتاہے۔اس موقع پر جنتادل (ایس) کے سینئر نائب صدر سید شفیع اﷲ نے کہاکہ بقر عید کے موقع پر مسلمان جانوروں کی قربانی میں احتیاط سے کام لیں ، کچھ شرپسندوں کی طرف سے جانوروں کوزبردستی پکڑنے کی کوشش کی جارہی ہے۔ ریاستی حکومت کی طرف سے ان کوششوں پر روک لگانے کے لئے جنتادل (ایس) کی طرف سے زور دیا جائے گا۔اس موقع پر پارٹی لیڈر بی ایم فاروق ، محیط الطاف ، روشن عباس ، وغیرہ موجود تھے۔