مودی حکومت کے انسداد گؤ کشی قانون کو کمار سوامی نے قرار دیا خوش آئند: گائیوں کی دیکھ بھال کیلئے مراکز قائم کرنے کا بھی مشورہ
بنگلورو،27؍مئی(ایس او نیوز) مرکزی حکومت کی طرف سے کل ملک بھر میں لاگو کئے گئے انسداد گؤ کشی قانون کا سابق وزیراعلیٰ اور ریاستی جنتادل(ایس) صدر ایچ ڈی کمار سوامی نے خیر مقدم کیااور کہاکہ مرکزی حکومت کو چاہئے کہ اس قانون کو نافذ کرنے کے ساتھ ملک بھر میں گائیوں کی دیکھ بھال کیلئے مراکز قائم کرے۔
بیجاپور میں اخباری نمائندوں سے بات چیت کرتے ہوئے انہوں نے کہاکہ مرکزی حکومت کی طرف سے جو قانون لاگو کیاگیا ہے اس کی وجہ سے جس طبقے کو نقصان ہوگا اس کی باز آباد کاری کی فکر بھی مرکزی حکومت کو کرنی چاہئے۔انہوں نے کہاکہ گائے کی پرورش میں جو طبقہ لگا ہوا ہے ان کی مدد کیلئے مرکزی حکومت کو گؤ پرورش مراکز قائم کرنے ہوں گے۔
بلگام میں وزیر شہری ترقیات وحج جناب روشن بیگ کی طرف سے اس بیان پر کہ ریاست مخالف سرگرمیوں میں ملوث منتخب نمائندوں کو نااہل قرار دینے کیلئے قانون وضع کیا جائے گا،خوش آئند قرار دیتے ہوئے انہوں نے کہاکہ ریاستی حکومت کی طرف سے جلد از جلد یہ قانون لاگو کیا جانا چاہئے ۔ بلگاوی میں کرناٹک مخالف مہاراشٹرا یکی کرن سمیتی کی طرف سے روشن بیگ کے اس بیان پر پرتشدد ردعمل اور کرناٹک کی بسوں پر جئے مہاراشٹرا کے نعرے لکھے جانے کی سخت مذمت کرتے ہوئے کمار سوامی نے کہاکہ ایم ای ایس اور شیوسینا کی شرارتوں کو روکنے میں ریاستی حکومت بری طرح ناکام ہوچکی ہے۔ انہوں نے کہا کہ کرناٹک اور مہاراشٹرا کے درمیان سرحدی تنازعہ کو باہمی مذاکرات کے ذریعہ نمٹانے کی کوشش کی جانی چاہئے۔