بھائی کو پسندیدہ وزارت دلانے میں مصروف کمار سوامی، کانگریس - جے ڈی ایس کے ممبران اسمبلی ناراض
بنگلور و،04؍جون ( ایس او نیوز؍آئی این ایس انڈیا )کرناٹک کے وزیر اعلی ایچ ڈی کمار سوامی کیلئے کانگریس کے مقابلہ اپنے بڑے بھائی ایچ ڈی ریوننا کو سنبھالنا مشکل ہے ۔ ریوننا سیاست میں کمار سوامی سے سینئر ہیں اور اپنے والد ایچ ڈی دیو گوڑا کے پسندیدہ بھی ہیں۔ بتایا جاتا ہے کہ پی ڈبلیو ڈی اور پاور کے قلمدانوں کیلئے گوڑا نے کانگریس صدر راہل گاندھی کو منالیا ہے ۔ اس کیلئے کانگریس لیڈر تیار نہیں تھے ، یہاں تک کہ جے ڈی ایس کے ’کرائسس منیجر ‘ڈی کے شیو کمار بھی اس کے خلاف تھے ۔ وزیر اعلی کے نزدیکی ذرائع کے مطابق خود کمار سوامی بھی والد کے اس فیصلہ سے ناخوش تھے۔
خیال رہے کہ پی ڈبلیو ڈی اور پاور ، ریوننا کی پسندیدہ وزارتیں ہیں ۔ انہوں نے 2004 سے 2006 کے درمیان کانگریس - جے ڈی ایس حکومت میں بھی یہی وزارتیں سنبھالیں تھیں۔ یہی نہیں 2006 سے 2007 تک بی جے پی اتحاد والی حکومت میں بھی وہ ان محکموں کے وزیر تھے۔
اس مرتبہ ریوننا نے اپنے والد سے ان وزارتوں کا مطالبہ کیا ۔ دیوگوڑے نے حسن ضلع کے ہولیناراسی پور سے پانچ مرتبہ ممبر اسمبلی رہ چکے ریوننا کی خواہش اس مرتبہ بھی پوری کردی ہے ۔ بتادیں کہ 1962 سے 1989 تک دیو گوڑا بھی اسی سیٹ سے چھ مرتبہ کامیاب ہوئے تھے۔
بتایا جارہا ہے کہ اتحاد کی اہم پارٹی کانگریس کے لیڈران راہل گاندھی کے ذریعہ دونوں بڑی وزارتیں جے ڈی ایس کو سونپنے سے ناراض ہیں ۔ سدا رمیا حکومت میں پاور محکمہ سنبھال چکے شیو کمار بھی کانگریس - جے ڈی ایس کے اس فیصلہ سے ناراض ہیں۔ نیوز 18 سے بات چیت میں انہوں نے کہا کہ ریوننا بڑے لیڈر ہیں ، میں ان پر تبصرہ نہیں کروں گا ، اس پارٹی نے مجھے چوکیدار کی نوکری دی ہے ، میں اس سے خوش ہوں۔