بنگلورو:24/مئی(ایس او  نیوز) محکمہئ انکم ٹیکس نے سابق وزیر اعلیٰ ایچ ڈی کمار سوامی اور ان کے افرادخانہ کے خلاف غیر قانونی طور پر اثاثے یکجا کرنے اور بیرون ممالک کو فنڈز کی غیر قانونی منتقلی کے الزامات میں ایف آئی آر درج کیاہے، اور اس کی تحقیقات شروع کردی ہے۔ ایسے مرحلے میں جبکہ ریاستی اسمبلی انتخابات سرپر ہیں، کمار سوامی اور ان کے اہل خانہ کے خلاف اس طرح کی شکایت سے جنتادل (ایس) کارکن کی صفوں میں انتشار پیدا ہوگیا ہے۔ کمار سوامی اور دیوے گوڈا خاندان پر الزام ہے کہ ان لوگوں نے 20ہزار کروڑ روپیوں سے زیادہ کی غیر قانونی کمائی حاصل کی ہے، اور اسے مختلف ممالک میں بطور سرمایہ لگایا ہے۔ ایک کانگریس کارکن ایس وینکٹیش گوڈا نے یہ شکایت محکمہئ انکم ٹیکس میں کرائی اور کہاکہ دیوے گوڈا خاندان نے اپنا زیادہ تر سرمایہ امریکہ اور دیگر آس پاس کے ممالک میں لگایا ہے۔ یاد رہے کہ گزشتہ ہفتہ ہی جنتکل غیر قانونی کانکنی کے الزامات میں کمار سوامی کو لوک آیوکتہ کی خصو صی تحقیقاتی ٹیم کے روبرو حاضر ہونا پڑاتھا، ابھی اس سے وہ سنبھل ہی نہیں پائے تھے کہ انکم ٹیکس کامعاملہ ان پر لاد دیا گیاہے۔ یہ الزام لگایا گیا ہے کہ کمار سوامی اور ان کے خاندان والوں نے رئیل ایسٹیٹ، فلم سازی، ایکسپورٹ، پارچہ جات، بین الاقوامی فنڈز ٹرانسفر اوردیگر شعبوں میں سرمایہ لگایا ہے۔ اس سلسلے میں چند دستاویزات بھی محکمہ کو پیش کئے گئے ہیں۔ یہ الزام بھی لگایا گیا ہے کہ دیوے گوڈا خاندان نے مسلسل کرناٹک کو لوٹا ہے، بنگلور میں جنتادل (ایس) کارکنوں کے نام پر غیر قانونی فنڈز وصول کئے گئے ہیں، آج جبکہ ریاست میں کانگریس برسر اقتدار ہے، اس کے باوجود بھی جنتادل (ایس) چند افسران سے رقم وصول کرتی ہے۔ زیادہ تر رقم دیوے گوڈا کے بڑے فرزند ایچ ڈی بالکرشنا کی بیوی کویتا کے نام پر بازاروں میں لگائی گئی ہے۔ امریکہ اور شمالی ہند میں دیوے گوڈا خاندان کی سرمایہ کاری کویتا کے نام پر ہی ہے۔