بنگلورو،31؍مئی(ایس او نیوز) ریاست بھر میں کے ایس آر ٹی سی بس اسٹانڈوں پر تمبا کو اشیاء کی فروخت پر مکمل پابندی عائد کی جاچکی ہے۔یہ بات آج کے ایس آر ٹی سی کے منیجنگ ڈائرکٹر اوما شنکر نے کہی۔ آج شہر میں کے ایس آر ٹی سی کی جانب سے عالمی یوم تمباکو کے سلسلے میں منعقدہ تقریب سے خطاب کرتے ہوئے انہوں نے کہاکہ کے ایس آر ٹی سی کے انتظامیہ نے تمام کے ایس آر ٹی سی بس اسٹانڈوں میں تمبا کو اور اس سے تیار ہونے والی اشیاء کی فروخت پر سختی سے پابندی عائد کردی ہے۔ اس پابندی کے نفاذ کی پہل کرتے ہوئے آج ہی میسور روڈ کے سیٹلائٹ بس اسٹانڈ کی دکانوں پر رکھی گئی تمبا کو اشیاء ضبط کرکے ان پر پانی ڈال دیا گیا۔ انہوں نے کہاکہ مرکزی اور ریاستی حکومتوں کی طرف سے عوامی مقامات پر سگریٹ نوشی پر سخت پابندی کے باوجود بھی بس اسٹانڈوں میں اب تک تمبا کو اشیاء کی فروخت کا سلسلہ جاری ہے۔ اس سلسلے کو روک لگانے کیلئے پابندی کو اور سخت کیا جارہاہے۔انہوں نے کہا کہ بس اسٹانڈوں میں اب تمباکو اشیاء کی فروخت کے ساتھ ان کی تشہیربھی ممنوع قرار دی جاچکی ہے۔ گزشتہ سال بس اسٹانڈوں میں سگریٹ نوشی پر پابندی عائد کئے جانے کے بعد سے اب تک ریاست بھر میں ایک لاکھ لوگوں کو پکڑا گیا ہے اور ان سے دو کروڑ روپے جرمانہ بھی وصول ہوا ہے۔ انہوں نے کہاکہ پچھلے پانچ چھ سال سے یہ تشہیر بڑے پیمانے پر ہورہی ہے کہ تمبا کو اشیاء کا استعمال نہ کیا جائے اس کے باوجود بھی یہ سلسلہ جاری رہا اسے دیکھتے ہوئے قانونی کارروائی کا طریقہ اپنا نا پڑا۔اب حکومتوں کی طرف سے عائد کی گئی پابندی پر عوام کا مثبت ردعمل سامنے آرہا ہے۔ بس اسٹانڈوں میں سگریٹ نوشی کے واقعات بہت کم ہوچکے ہیں۔انہوں نے کہاکہ عالمی صحت تنظیم نے 2030 تک تمباکو کے استعمال پر مکمل پابندی لگانے کا ارادہ کرلیاہے۔ انہوں نے کہاکہ لوگوں نے اگر اس کا ساتھ دیاتو بہت جلد ملک میں تمبا کو کے استعمال کو ختم کیاجاسکتاہے۔انہوں نے کہاکہ کے ایس آر ٹی سی کی طرف سے اس سلسلے میں بیداری مہم کے ساتھ جرمانے وصول کرنے کا معاملہ بھی سختی سے آگے بڑھایاجائے گا۔آنے والے دنوں میں کے ایس آر ٹی سی بس اسٹانڈوں میں تمبا کو نوشی کے شکار افراد کی مفت طبی جانچ کے کیمپ بھی لگائے جائیں گے۔ اس موقع پر کے ایس آرٹی سی کے ڈائرکٹر سیکورٹی بی این ایس ریڈی اور دیگر عہدیداران موجود تھے۔