کاویری کا پانی تالابوں میں بہانے کا مطالبہ،ہنسور سے بنگلور تک پدیاترا کرنے کمار سوامی کی دھمکی
بنگلورو:25/ جولائی(ایس او نیوز) سابق وزیراعلیٰ اور ریاستی جنتادل (ایس) صدر ایچ ڈی کمار سوامی نے ریاستی حکومت کو متنبہ کیا ہے کہ ایک ہفتے کے اندر کرشنا راجہ ساگر ڈیم سے کاویری کا پانی اگر تالابوں میں بہایا نہیں گیاتو وہ ہنسور سے بنگلور تک احتجاجی پدیاترا کریں گے۔ آج میسور میں اخباری نمائندوں سے بات چیت کرتے ہوئے انہوں نے کہاکہ پچھلے دو دن سے کرشنا راجہ ساگر ڈیم سے پانی نالوں میں بہانے کا مطالبہ کرتے ہوئے رکن اسمبلی سارا مہیش کی قیادت میں دن رات کا احتجاج جاری ہے، لیکن ریاستی حکومت نے اس پر کوئی توجہ نہیں دی ہے۔ کمار سوامی نے کہاکہ ریاست میں خشک سالی کی صورتحال انتہائی سنگین ہے، عوام کیلئے پینے کا پانی نہیں ہے تو مویشی چارہ کی قلت سے مررہے ہیں۔ ان لوگوں کی پیاس بجھانے کیلئے پانی کا تقاضہ کیا جارہاہے۔ کمار سوامی نے کہاکہ ایک ہفتہ کے اندر اگر کرشنا راجہ ساگر ڈیم سے نالوں میں پانی بہایا نہیں گیاتو وہ ہنسور سے بنگلور تک پدیاترا کرنے پر مجبور ہوجائیں گے۔ انہوں نے کہاکہ ڈیم کا پورا پانی حکومت دیگر مقاصد کیلئے رکھنا چاہتی ہے تو رکھ لے، پینے کیلئے جتنا پانی درکار ہے اتنا ہی مانگا جارہا ہے۔ریاستی حکومت کی طرف سے کسانوں کے قرضہ جات کی معافی کو مفروضہ قرار دیتے ہوئے کمار سوامی نے کہاکہ انتخابات کو مدنظر رکھتے ہوئے سدرامیا نے یہ سیاسی فیصلہ لیاہے، ان قرضہ جات کی معافی سے صرف چند کسانوں کو فائدہ ہوا ہے۔ قرضہ جات کی معافی کیلئے بھی افسران نے غیر ضروری شرائط لاگو کی ہیں، جس پر نظر ثانی کی ضرورت ہے۔