کسانوں نے بقایا جات وصول کرنے کیلئے ٹرین ضبط کرلی
بنگلورو،24؍اکتوبر(ایس او نیوز) کسانوں کو زمین کے عوض معاوضہ ادا نہ کئے جانے پر آج عدالت کے حکم کے مطابق ہری ہر ریلوے اسٹیشن پر آنے والے دھارواڑ میسور انٹر سٹی ٹرین کو کسانوں نے عدالت کے افسران کے ساتھ ضبط کرلیا۔ بعد میں معاوضہ کی ادائیگی کے سلسلے میں ریلوے حکام کی طرف سے دستخطی بانڈ دئے جانے پر ریل کو آگے بڑھنے دیا گیا۔ ہری ہر ۔کوٹور ریلوے لائن کی تعمیر کیلئے ہری ہر تعلقہ کے کسانوں نے اپنی زمین ریلویز کو دی تھی ، لیکن اب تک محکمۂ ریلویز نے ان کسانوں کو معاوضہ ادا نہیں کیاتھا۔ ریلوے حکام کے اس رویہ سے نالاں کسانوں نے یہاں کے چیف سیول میجسٹریٹ سے رجوع کیا۔ معاملہ کا جائزہ لینے کے بعد عدالت نے یہ حکم صادر کیا کہ فوری طور پر معاوضہ کی رقم ادا کردی جائے، اس کے باوجود بھی ریلویز نے رقم کی ادائیگی میں لاپرواہی برقرار رکھی ، دوبارہ جب کسانوں نے رقم ادا نہ کئے جانے کی شکایت کرتے ہوئے عدالت سے رجوع کیا تو جج نے ریل کو ضبط کرلینے کی ہدایت دی۔آج صبح عدالت کے حکام کسانوں کے ساتھ ہری ہر ریلوے اسٹیشن پہنچے اور یہاں سے جانے والے میسور دھارواڑ انٹرسٹی ریل گاڑی کو ضبط کرلیا۔ فوری طور پر متحرک ریلوے حکام نے عدالت کو یہ تحریری بانڈ پیش کیا کہ ایک ہفتے کے اندر وہ کسانوں کو واجب الادا رقم دے دیں گے ۔ اس کے بعد عدالت کے حکام نے انٹرسٹی ٹرین کو آگے بڑھنے دیا۔آج صبح 9 بجے کے آس پاس ضبط کی گئی اس ٹرین کو گیارہ بجے کے بعد جانے دیا گیا۔