بنگلورو،27؍جولائی(ایس او نیوز) ریاستی وزیر برائے اعلیٰ تعلیمات جی ٹی دیوے گوڈا نے کہا ہے کہ ریاست بھر کے اعلیٰ تعلیمی اداروں میں پرنسپل اور لکچرارس سمیت پانچ ہزار اسامیوں کو پر کیا جائے گا۔

اخبار ی نمائندوں سے بات چیت کرتے ہوئے انہوں نے کہاکہ ڈگری کالجوں کے 395 پرنسپلس ، 3800 لکچراروں کی اسامیوں کو عنقریب پر کرنے کے لئے محکمۂ مالیات سے بات چیت جاری ہے۔ محکمۂ مالیات کی منظوری کے بعد اگلے چھ ماہ کے دوران پانچ ہزار سے زائد تقررات پورے کرلئے جائیں گے ۔

انہوں نے کہاکہ ڈگری کالجوں میں بی اے کورس کے لئے طلبا کے داخلوں کے اوسط میں غیر معمولی کمی کو دیکھتے ہوئے حکومت نے طے کیا ہے کہ ہنر پر مبنی نئے موضوعات کو کورس کا حصہ بنایا جائے یا پھر کالجوں میں ڈگریوں کے ایسے ہی ڈسپلن شروع کئے جائیں جو ہنر پر مبنی ہوں۔اگلے تعلیمی سال سے ایسے نئے کورسوں کی شروعات کی جائے گی، جس کی تکمیل کے بعد طالب علم کو روزگار کے لئے دھکے کھانے کی نوبت نہ آئے۔ انہوں نے کہا کہ شعبۂ اعلیٰ تعلیم میں تعلیم کے معیار کو بلند کرنے کے لئے ڈگری کالجوں کے انتظامیہ کے ساتھ وہ میٹنگوں کا مسلسل اہتمام کرناچاہتے ہیں ، اس کی پہلی کڑی کے طور پر یکم تا 3؍ اگست وہ سرکاری ڈگری کالجوں کے پرنسپلوں سے مسلسل میٹنگوں کا اہتمام کریں گے۔

انہوں نے کہاکہ درج فہرست ذاتوں اور قبائل سے وابستہ طلبا کو لیاپ ٹاپ کی فراہمی مکمل کرلی گئی ہے۔عام زمرے سے وابستہ طلبا کو لیاپ ٹاپ دینے کی کوئی تجویز حکومت کے زیر غور نہیں ہے۔انہوں نے کہا کہ ریاست کے 102 ڈگری کالج کرایوں کی عمارتوں میں چل رہے ہیں اور یہاں پر تدریسی عملے کی بھی کمی ہے، تدریسی عملے کی کمی کو پورا کرنے کے لئے حکومت نے 10500 مہمان لکچرارس کو مقرر کرنے کا فیصلہ کیا ہے۔