بنگلورو،9؍ جولائی (ایس او  نیوز) لو ک آیوکتہ ادارے کو مزید سکیورٹی فراہم کی گئی ہے۔ لوک آیوکتہ میں عوام کاداخلہ سخت کردیا گیا ہے ۔ بغیر پاس کے کوئی بھی شخص لوک آیوکتہ کے دفتر میں داخل نہیں ہوسکتا ۔

لوک آیوکتہ جسٹس پی وشواناتھ شٹی پر دہشت گردوں کے حملے کے بعد لوک آیوکتہ ادارے کو مرحلہ وار سکیورٹی فراہم کی جارہی ہے ۔ سب سے پہلے عوام بغیر کسی دشواری کے لوک آیوکتہ دفتر پہنچ کے شکایات پیش کرسکتے تھے لیکن اس واقعہ کے بعد دفتر کے صدر دروازے پرمیٹل ڈکٹیٹرس نصب کئے گئے ہیں ۔ دفتر آنے والے ہر شخص کی جانچ کرنے کے بعد انہیں اندر جانے کی اجازت دی جارہی ہے ۔ اس کے علاوہ پورے دفتر کے اطراف سی سی ٹی وی کیمرے نصب کئے گئے ہیں ۔ پہلی منزل میں واقع لوک آیوکتہ دفتر کے دورازے پر بھی میٹل ڈکٹیٹر نصب کردیئے گئے ہیں ۔ اب تک لوک آیوکتہ دفتر پہنچنے والوں کے نام ، پتے ، موبائل نمبر ، کس سے ملنا ہے اور ملنے کا مقصد یہ تمام تفصیل ایک کتاب میں درج کرنے کے بعد متعلقہ شخص کے دستخط لئے جاتے تھے اس کے بعد انہیں اندر داخل ہونے کی اجازت دے جاتی تھی ۔ اب پاس تقسیم کرنے کا انتظام کیاگیا ہے ۔ افسران سے ملاقات کرنے کے بعد واپس لوٹتے ہوئے اس پاس کو واپس کرنا ہوگا ۔ اس پاس کو صحافیوں کے لئے لازمی کردیا گیا ہے ۔ واضح رہے کہ گزشتہ مارچ میں ٹمکور کے کنٹراکٹر تیج راج نے تین بار جسٹس شٹی پر قاتلانہ حملہ کیا تھا ۔ کئی دنوں تک آرام کرنے کے بعد لوک آیوکتہ جسٹس وشواناتھ شٹی دوبارہ دفتر لوٹ آئے ہیں ۔ اس طرح کا واقعہ دوبارہ درپیش نہ ہونے کیلئے لوک آیوکتہ میں عوام کا داخلہ سخت کردیا گیا ہے ۔