بنگلورو،19؍فروری(ایس او نیوز) کبڈی کا کھیل دیکھنے کے دوران دل پر شدید دورہ پڑنے سے کل فوت ہوجانے والے کسان لیڈر و رکن اسمبلی کے ایس پٹنیا کی آخری رسومات چہارشنبہ 21فروری کو ان کے آبائی گاؤں کیتناہلی میں ادا کی جائیں گی۔ دریں اثناء میسور کے دورہ پر جانے سے قبل وزیراعلیٰ سدارامیا نے آج صبح پانڈوا پورہ تعلقہ کیتناہلی جا کر پٹنیا کا آخری دیدار کیا۔ان کے بیٹے درشن اور ان کی بیوی کے علاوہ اہل خانہ کے دیگر افراد کو دلاسہ دیا۔ اس موقع پر سدارامیا نے کہا کہ مرحوم نے اپنی زندگی کا بہت بڑا حصہ کسانوں کے حقوق کی خاطر جدوجہد کرنے میں صرف کردیا۔انہوں نے بتایاکہ پٹنیا کے اہل خانہ کے غم میں ہم برابر کے شریک ہیں ۔ اس موقع پر ریاستی وزیر ڈاکٹر ایچ سی مہادیوپا، رکن پارلیمان دھرونا رائنا کے علاوہ دیگر اہم شخصیات بھی موجود رہیں ۔ سابق وزیراعلیٰ ایس ایم کرشنا کے بشمول سابق وزیر امبریش اور اہم شخصیات نے بھی پٹنیا کا آخری دیدار کیا۔ پٹنیا کی جائے پیدائش کیتناہلی میں ہزاروں لوگوں نے مرحوم کا آخری دیدار کرکے انہیں خراج عقیدت پیش کیا۔آج ریاستی لجس لیٹرس کے دونوں ایوانوں میں کھڑے ہو کر ایک منٹ کی خاموشی اختیار کرکے کسان لیڈر کو خراج عقیدت پیش کیا گیا۔ آج صبح جب اسمبلی کی کارروائی کاآغاز ہوا تو اسپیکر کے بی کولیواڑ نے تعزیتی قرار داد اسمبلی میں پیش کی۔اس کی تائید کرتے ہوئے ریاستی وزیر برائے قانون و امور پارلیمان ٹی بی جئے چندرا نے مرحوم کو کسانوں کا مسیحا قرار دیتے ہوئے کہا کہ انہیں اپنے سے زیادہ کسانوں کے مفاد کی فکر تھی۔ مرحوم کو ایوان میں تعزیت پیش کرتے ہوئے اپوزیشن بی جے پی لیڈر جگدیش شٹر نے کہاکہ کسانوں کے معاملات میں پٹنیا کبھی بھی ایوان یا ایوان سے باہر کسی طرح کا سمجھوتہ نہیں کرتے تھے۔ ریاستی قانون ساز کونسل میں چیرمین شنکر مورتی نے تعزیتی قرار داد پیش کی۔ کونسل کے بعد ایم آر سیتا رام اور اپوزیشن لیڈر کے ایس ایشورپا نے باری باری سے بات کرتے ہوئے کہاکہ کسانوں سے متعلق پٹنیاکی ہمدردی اور فکر سے متعلق کوئی سوال کرنے کی ضرورت ہی نہیں ۔پٹنیاکے دیہانت پر تعزیتی پیغامات روانہ کرنے والوں میں کے پی سی سی صدر ڈاکٹر جی پرمیشور، بی جے پی کے ریاستی صدر ایڈی یورپا، جے ڈی ایس کے ریاستی صدر ایچ ڈی کمارسوامی، بی جے پی لیڈر وی سومنا،بی این بچے گوڈاشامل ہیں ۔پٹنیاکے دیہانت پر تعزیت ادا کرنے والے تقریباً تمام عمائدین و قائدین نے بتایا کہ پٹنیا کے انتقال سے کسان برادری کا ناقابل تلافی نقصان ہوا ہے۔