ہاؤزنگ بورڈ کی طرف سے کنگیری میں فلاٹس کی عمارتیں تیار،مناسب قیمتوں پر انہیں عوام میں فروخت کیاجائے گا: کرشنپا
بنگلورو، 22ستمبر (ایس او نیوز؍عبدالحلیم منصور) ریاستی وزیر ہاؤزنگ ایم کرشنپا نے کہاکہ کرناٹکا ہاؤزنگ بورڈ کی طرف سے کنگیری سوریہ نگر، اور بنڈے مٹھ علاقوں میں جدید ترین مکانات کی تعمیر کی جا ئے گی اور انہیں سبسیڈی قیمتوں پر فروخت کیا جائے گا۔ آج کنگیری سیٹلائٹ ٹاؤن میں کرناٹکا ہاؤزنگ بورڈ کی طرف سے زیر تعمیر ہمہ منزلہ عمارتوں کا جائزہ لینے کے بعد اخباری نمائندوں سے بات چیت کرتے ہوئے مسٹر کرشنپا نے کہاکہ وزیر اعظم آواس یوجنا کے تحت سبسیڈی شرحوں پر ان مکانات کی تعمیر کی جارہی ہے۔ انہوں نے کہا کہ ترجیحی بنیاد پر حکومت درج فہرست طبقات سے وابستہ مستحقین کو مکانات فراہم کررہی ہے۔ انہوں نے کہاکہ ان مکانات کے حصول کیلئے فوری طور پر ایک لاکھ روپیوں کی ادائیگی کے بعد انہیں الاٹمنٹ لیٹر جاری کیا جائے گا۔ جس پر اسٹیٹ بینک آف انڈیا، ایچ ڈی ایف سی ، آئی سی آئی سی بینک سمیت آٹھ بینکوں کی طرف سے قرضہ جات دئے جائیں گے، ان قرضہ جات پر کرناٹک ہاؤزنگ بورڈ کی طرف سے شورٹی دی جائے گی۔انہوں نے کہاکہ ہاؤزنگ بورڈ کی طرف سے معیاری مکانات تعمیر کئے جارہے ہیں اور ان میں قیام کیلئے کوئی قانونی رکاوٹ بھی نہیں ہے۔ انہوں نے کہاکہ ہاؤزنگ بورڈ کی طرف سے پندرہ سو مکانات کی تعمیر کی جاچکی ہے، ہزار مکانات بغیر سبسیڈی کے فروخت کئے جائیں گے اور30 فیصد مکانات سبسیڈی قیمتوں پر درج فہرست طبقات کو دئے جائیں گے۔اس موقع پر کرناٹکا ہاؤزنگ بورڈ کے چیرمین مالکیا گتے دار نے بتایاکہ مکینوں کی مانگ پر ہاؤزنگ بورڈ کی طرف سے بروقت مکانات کی فراہمی بھی کی جارہی ہے۔ ان مکانات میں پانی کی فراہمی یقینی بنانے کیلئے بی ڈبلیو ایس ایس بی کو چار کروڑ روپے ادا کئے گئے ہیں۔ ہاؤزنگ بورڈ کے تمام پراجکٹوں میں تعمیر ہونے والے ہر فلاٹ میں معیاری بنیادی سہولیات فراہم کی جارہی ہیں۔ انہوں نے کہاکہ فی مربع فیٹ مکان کی قیمت 3650 روپے ہے۔ اس میں دو فیصد رعایت کے ساتھ اب یہ مکانات 3300روپے مربع فیٹ میں فروخت کئے جائیں گے۔اس موقع پر ہاؤزنگ کمشنر اے بی ابراہیم ، رکن اسمبلی ایس ٹی سوم شیکھر، کارپوریٹر شاردا منی راجو وغیرہ موجود تھے۔