بنگلورو،15؍نومبر(ایس او نیوز؍عبدالحلیم منصور) سفر حج 2018 ، کیلئے درخواست فارموں کاآج رچمنڈ روڈ پر واقع ریاستی حج کمیٹی کے دفترمیں اجراء عمل میں آیا ۔ ساتھ ہی حج کیلئے درخواست فارموں کے داخلے کا سلسلہ بھی باضابطہ شروع کردیا گیا ۔اس موقع پر ریاستی حج کمیٹی کے ایگزی کیٹیو آفیسر سرفراز خان ، حج کیمپ کے چیف والنٹیر رومان بیگ ، مولانا محمد لطف اﷲ مظہر رشادی خطیب وامام مسجد قادریہ ،حج کمیٹی کے اراکین جے سید ثناء اﷲ ،ایم ایس ارشد اور سید مظہر گلبرگہ کے علاوہ ریاستی حج کمیٹی کے نوڈل آفیسر سید اعجازاحمد موجود تھے۔ اس موقع پر اپنے خیالات کا اظہار کرتے ہوئے رومان بیگ نے حج درخواست فارم داخل کرنے والوں کو مبارکباد پیش کی اور کہاکہ قرعہ کے ذریعہ جن خوش نصیبوں کا انتخاب ہوگا انہیں اس بار سعادت حج نصیب ہوگی۔ انہوں نے کہاکہ جن لوگوں کا نام قرعہ میں نہ آئے وہ مایوس نہ ہوں، بلکہ اﷲ کی ذات سے قوی امید رکھیں کہ انہیں بھی اﷲ اپنے گھر کی حاضری ضرور میسر کروائیں گے۔انہوں نے کہاکہ حج کیمپ میں ایک رضاکار کی مانند وہ شروع سے ہی اپنے والد وزیر حج جناب روشن بیگ کے ساتھ خدمت میں لگے ہوئے ہیں۔ حج بھون میں امسال عازمین حج کی روانگی اور واپسی کیلئے انتظامات کے جو تجربات ہوئے ہیں ان کی بنیاد پر آئندہ برسوں میں انہیں اور بھی سدھارنے کیلئے پوری کوشش کی جائے گی ۔اس میں رضاکاروں اور عازمین حج کا بھرپور تعاون درکار ہے۔ مولانا محمد لطف اﷲ مظہر رشادی نے اپنے خیالات ظاہر کرتے ہوئے اس بات پر افسوس ظاہر کیاکہ مرکزی حج کمیٹی نے اس بار چوتھی مرتبہ درخواست دینے والے عازمین حج کو بغیر قرعہ کے منتخب کرنے کا نظام ختم کردیا ہے۔ انہوں نے کہاکہ اس نظام کو ختم کرنے سے ایک سہولت یہ ہوگی کہ قرعہ میں اور زیادہ عازمین کے انتخاب کی گنجائش رہے گی۔ انہوں نے نصیحت کی کہ حج درخواست جمع کرنے کے بعد مسلسل نمازوں کی پابندی کریں اور صلوٰۃ الحاجت کا اہتمام کرکے اﷲ سے دعا کریں کہ انہیں حج کی سعادت نصیب ہو ۔ 

ریزرو زمرہ بحال کرنے کی کوشش جاری:حج کمیٹی کے ایگزی کیٹیو آفیسر سرفراز خان نے اس موقع پر اپنے خیالات کا اظہار کرتے ہوئے کہاکہ حال ہی میں ممبئی میں مرکزی حج کمیٹی کی جانب سے تمام ریاستوں کے حج کمیٹی چیرمینوں اور ایگزی کیٹیو آفیسروں کی کانفرنس منعقد کی گئی تھی، جس میں کرناٹک کی نمائندگی کرتے ہوئے ریاستی حج کمیٹی چیرمین اور وزیر حج جناب روشن بیگ نے پرزور مطالبہ کیا کہ 70 سال سے زائد کی عمر کے عازمین اور چوتھی مرتبہ درخواست دینے والے عازمین کیلئے ریزرو کوٹہ برقرار رکھا جائے ۔ مرکزی حج کمیٹی نے 70 سال سے زیادہ کی عمر کے عازمین کیلئے بغیر قرعہ کے انتخاب کی گنجائش رکھی ہے، لیکن چوتھی مرتبہ درخواست دینے والوں کیلئے فی الوقت بغیر قرعہ کے انتخاب کی گنجائش نہیں رکھی گئی ہے۔ جناب روشن بیگ کی طرف سے اب بھی یہ کوشش جاری ہے کہ چوتھی مرتبہ درخواست دینے والوں کیلئے کم ازکم رواں سال اور آئندہ سال تک ہی سہی بغیر قرعہ کے انتخاب کی گنجائش رکھی جائے۔ انہوں نے عازمین سے گذارش کی کہ اس کوشش کی کامیابی کیلئے دعا کریں۔

قربانی کے کوپن کا مسئلہ:اپنے خیالات ظاہر کرتے ہوئے حج کمیٹی کے نوڈل آفیسر سید اعجاز احمد نے حج درخواست فارمس بھرتی کرنے والوں سے گذارش کی کہ درخواست فارم پر کرنے سے پہلے تمام شرائط کابغور مطالعہ کریں۔ انہوں نے کہاکہ حج کمیٹی کی طرف سے جانے والے عازمین اگر درخواست جمع کرتے وقت قربانی کا کوپن حاصل کرنے کی خواہش ظاہر کریں گے تو انہیں مقررہ رقم کی ادائیگی پر کوپن دے دیا جائے گا۔اس کوپن کے حصول کو اختیاری رکھا گیا ہے۔ انہوں نے واضح کیاکہ قربانی کا کوپن حاصل کرنے والے حجاج کو یوم عرفہ کے بعد قربانی کی تکمیل کے متعلق اطلاع دینے کا کوئی انتظام نہیں ہے۔ انہیں اپنے قیاس کی بنیاد پر قربانی کی ادائیگی اور احرام کی پابندی ختم کرنی ہوگی۔ قربانی ادا ہونے کی کوئی اطلاع دینے کا نظام حج کمیٹی کی طرف سے نہیں کیا گیا ہے اس کے باوجود بھی اگر عازمین قربانی کے کوپن حاصل کرنا چاہیں تو ان کے اختیار میں ہے۔ انہوں نے کہاکہ جہاں تک مسلک امام ابو حنیفہ کا تعلق ہے حج کی قربانی کے متعلق اطلاع ملنے کے بعد ہی یا پھر بذات خود قربانی کرنے پر حج کے احرام کی پابندی حلق کروانے کے ساتھ ختم ہوتی ہے۔ دیگر مسلکوں سے وابستہ احباب اپنے اپنے مکتب فکر کے مطابق عمل کریں۔اس موقع پر مختصر نشست کاآغاز مولانا مقصود عالم رشادی نائب امام جامع مسجد بنگلور سٹی کی قرأت سے ہوا۔ آخر میں مولانا محمد لطف اﷲ مظہر رشادی نے دعا کی۔