پولیس کی تنخواہوں پر نظر ثانی کیلئے حکومت کرناٹکا کی آمادگی
بنگلورو۔26/ستمبر(ایس او نیوز) ریاستی پولیس فورس کی طرف سے یہ دیرینہ مانگ رہی ہے کہ ان کی تنخواہوں میں اضافہ کیا جائے۔ اس سلسلے میں سینئر پولیس آفیسر راگھویندرا اورادکر کی قیادت میں ایک کمیٹی تشکیل دی گئی تھی، جس نے پولیس فورس میں شامل افسران اور جوانوں کی تنخواہوں میں دس تا پندرہ فیصد اضافہ کرنے حکومت سے سفارش کی تھی، ریاستی حکومت نے ان سفارشات کو منظور کرنے پر آمادگی ظاہر کردی ہے۔ پولیس عملے کی تنخواہوں پر نظر ثانی کا جائزہ لے کر رپورٹ پیش کرنے کی ذمہ داری اڈیشنل ڈائرکٹر جنرل آف پولیس راگھویندرا اورادکر کی قیادت والی کمیٹی کے سپرد کی گئی تھی۔اس کمیٹی نے آج وزیر داخلہ ڈاکٹر جی پرمیشور کو اپنی رپورٹ پیش کردی۔ وزیر داخلہ نے اشارہ دیا کہ حکومت کی طرف سے ان شفارشات کو منظوری دی جائے گی۔فوری طور پر اگر انہیں منظور کرلیاگیا تو پولیس فورس کو دسہرہ کے انعام کے طور پر تنخواہوں میں اضافہ ہوجائے گا۔ ڈاکٹر پرمیشور نے کہاکہ اس رپورٹ کے متعلق وہ ایک دو دن میں ہی وزیر اعلیٰ سدرامیا سے بات چیت کریں گے اور ان سے منظوری ملتے ہی اگلے ماہ کی تنخواہ ہی اضافی شکل میں ادا کردی جائے گی۔ ڈاکٹر پرمیشور نے بتایاکہ اورادکر نے اپنی رپورٹ ترتیب دینے سے پہلے ملک کی 30 ریاستوں کی پولیس کو دی جارہی تنخواہوں کا جائزہ لیا، اسی کی بنیاد پر تنخواہوں میں اضافہ کی سفارش کی گئی ہے۔ یاد رہے کہ حال ہی میں اپنی تنخواہوں میں اضافہ پر زور دیتے ہوئے ریاستی پولیس فورس نے ہڑتال کا منصوبہ مرتب کیاتھا اور اجتماعی چھٹی کی تیاری بھی کرلی تھی۔ اس صورتحال کو قابو سے باہر ہونے سے روک کر حکومت نے تنخواہوں پر نظر ثانی کیلئے راگھویندرا اورادکر کمیٹی قائم کی تھی۔ آج اس رپورٹ کو پیش کئے جانے کے مرحلے میں وزیر داخلہ کے ہمراہ ریاست کے ڈی جی پی اوم پرکاش، شہر کے پولیس کمشنر این ایس میگرک، آئی جی پی کمل پنت اور دیگر افسران موجود تھے۔