ایک ہفتہ کے اندر تمام صفائی کرمچاریوں کی تنخواہ ادا ہوگی خودکشی کرنے والے سبرامنی کے کنبہ کو 10لاکھ کاچیک دینے کے بعد پرمیشور کا بیان
بنگلورو،16؍جولائی (ایس او نیوز)ریاستی نائب وزیراعلیٰ ڈاکٹر جی پرمیشور نے کہا کہ ایک ہفتہ کے اندر تمام صفائی کرمچاریوں کی تنخواہ کی رقم ادا کرنے کیلئے افسران کو ہدایت دی ہے۔
حال ہی میں خود کشی کرنے والے بروہت بنگلورمہا نگر پالیکے( بی بی ایم پی)صفائی کرمچاری سبرامنی کے مکان پہنچ کر گھر والوں کو دلاسہ دیتے ہوئے 10لاکھ روپئے کامعاوضہ چیک سبرامنی کی بیوہ کے حوالے کرنے کے بعد اخباری نمائندوں سے بات کرتے ہوئے نائب وزیراعلیٰ نے کہا کہ صفائی کرمچاری خودکشی کرلینے کا اقدام ہرگز نہ کریں ۔ کنٹراکٹ پر کام کررہے صفائی کرمچاریوں کو 6ماہ سے تنخواہ جاری نہ کئے جانے کے متعلق انہیں تفصیلات ملی ہیں ۔ انہوں نے بتاے کہ وہ اس معاملہ کو سنجیدگی سے لے کر ایک ہفتہ کے اندر تمام صفائی کرمچاریوں کی واجب الادا تنخواہ کی رقم ادا کرنے کیلئے افسران کو ہدایت دی ہے ۔
پرمیشور نے کہا کہ سبرامنی کی خودکشی کا واقعہ نے انہیں مایوس کردیا ہے۔ کنٹراکٹ پر کام کررہے صفائی کرمچاریوں کو مقررہ وقت پر تنخواہ جاری نہ کرنے کی روایت ختم کرکے تبدیلی لانے کی اشد ضرورت ہے ۔ تنخواہ راست طور پر صفائی کرمچاریوں کے کھاتوں میں جمع کرنے کا نظام جلد شروع کرنا چاہئے ۔ کنٹراکٹر ضرورت سے زیادہ صفائی کرمچاریوں کی خدمات حاصل نہ کریں ۔ ضرورت سے زیادہ صفائی کرمچاریوں کی خدمات حاصل کرنے کی وجہ سے ہی مسئلہ اٹھ کھڑا ہونے لگا ہے ۔
انہوں نے افسران کو سخت تاکید کی کہ وہ اب آئندہ صفائی کرمچاریوں کی تنخواہ کی رقم جاری کرنے کے معاملہ میں کسی بھی طرح کی کوئی لاپروائی نہ کریں۔بلکہ مقررہ وقت پر ان کی تنخواہ جاری کرنے کے درکار اقدامات کریں۔پرمیشور نے کہا کہ آنے والے پارلیمانی انتخابات کا پردیش کانگریس کمیٹی ( کے پی سی سی ) اجتماعی قیادت کے ذریعہ مقابلہ کرے گی ۔ اس میں کوئی دو رائے نہیں ہے ۔
انہوں نے بتایا کہ پارٹی کے سینئر لیڈر ملیکارجن کھرگے، سدرامیا ،دنیش گنڈوراؤ سمیت دیگر سینئر لیڈران متحدہ طور پر آنے والے لوک سبھا انتخابات کاسامنا کریں گے۔ انہیں امید ہے کہ اس مرتبہ زیادہ سے زیادہ سیٹوں پر کانگریس اپنی جیت درج کرے گی۔ انہوں نے کہا کہ مرکز میں فرقہ پرست جماعت کو اقتدار سے دور رکھنا ہی کانگریس کا اہم مقصد ہے ۔ اس مقصد میں کامیابی کیلئے حکمت عملی تیار کرکے اس پر عمل کرنے کیلئے پارٹی کے تمام لیڈران پر زور دیا جائے گا ۔ اس موقع پرمےئرسمپت راج ،بی بی ایم پی کمشنر منجوناتھ پرساد کے علاوہ بی بی ایم پی افسران موجود تھے۔