بنگلورو،17؍اکتوبر(ایس او نیوز) ریاست میں بجلی کی پیداوار کے لئے درکار کوئلے کی فراہمی بروقت یقینی بنانے کے لئے وزیر اعلیٰ ایچ ڈی کمارسوامی نے مرکزی وزیر کوئلہ پیوش گوئل سے اپیل کی ہے۔

پیوش گوئل کو لکھے گئے مکتوب میں کمار سوامی نے کہا ہے کہ ریاست میں کوئلے کی قلت کو دور کرنے کے لئے مرکزی حکومت کی این سی ایل کے ذریعے کرناٹک کو کوئلے کی فراہمی یقینی بنائے ۔

ریاست میں تھرمل توانائی کی پیداوار کے لئے کوئلے کی ضرورت کا تخمینہ دیتے ہوئے کمار سوامی نے کہاکہ 1720 میگاواٹ بجلی کی پیداوار کرنے والے رائچور تھرمل پاور پلانٹ میں کوئلے کا ذخیرہ نہ ہونے کے برابر ہے۔

انہوں نے کہاکہ کوئلے کی فراہمی کے لئے جو معاہدہ ہوا ہے اس کے مطابق مرکزی حکومت نے اب تک ریاست کو چھ لاکھ ٹن کوئلہ مہیا نہیں کرایا ہے۔ آنے والے دنوں میں کوئلے کی فراہمی بروقت کرانے کا مطالبہ کرتے ہوئے کمار سوامی نے کہا ہے کہ اگر تھرمل پاور پلانٹ کو کوئلے کی فراہمی میں کوئی رکاوٹ نہ رہی تو ریاست میں بجلی کی قلت کا مسئلہ بھی نہیں رہے گا۔