بنگلورویکم جون(ایس او نیوز) حکومت نے شہر کے تمام سرکاری اور نجی اسکولوں کے اساتذہ پر فون کے استعمال پر پابندی لگادی ہے۔ اس سلسلہ میں ریاست کے محکمۂ تعلیمات (ابتدائی تعلیم) کے ڈائرکٹر کے سرکیولر میں بتایاگیا ہے کہ اسکولوں میں کام کے اوقات میں اساتذہ اور ملازمین فون کا استعمال کرتے ہیں جس کے سبب ان کا بچوں کو پڑھانے میں بُرا اثر پڑسکتا ہے جس کے لئے اسکولوں کے ذمہ دار قدم اٹھائیں۔ 9؍ مئی کو جاری کردہ اس سرکیولر میں اسکول کے ہیڈماسٹر یا ہیڈمسٹرس کو فون کے استعمال پرچھوٹ دی گئی ہے۔ لیکن ان کو بھی اس کا استعمال ممنوع ہے جب وہ طلباء کو پڑھا رہے ہوتے ہیں۔ انہوں نے اس سرکیولر میں بتایا کہ اگر ان کو اس سلسلہ میں کوئی شکایت موصول ہوئی تواسکول کے ہیڈماسٹر یا ہیڈمسٹرس کو ذمہ دار ٹہرایا جائے گا۔ یہ پابندی ریاست کے تمام اسکولوں پر ہے۔ اس سلسلہ میں محکمۂ تعلیمات (ابتدائی تعلیم) کے ڈائرکٹر بی کے بسواراج نے بتایا کہ ریاست کے تمام بلاک ایجوکیشن افسران اپنی حدود کے اسکولوں کو یہ سرکیولر جاری کریں ۔ اسکولوں میں اساتذہ کے فون کے استعمال سے متعلق بچوں کے ماں باپ سے کئی شکایتیں کی گئی تھی کہ کلاسوں کے دوران استاد بچوں کو اسباق لکھنے دے دیتے ہیں اس دوران وہ اپنے فون میں واٹس اپ چاٹنگ کرنے میں مصروف رہتے ہیں۔ یہ بہت غلط ہے ایسے اساتذہ بچوں کو قابل بنانے میں ناکام ہوتے ہیں بنگلورکے ایک سرکاری اسکول کے ہیڈماسٹر نے بتایا کہ اگر اساتذہ کو اپنے گھروں سے کوئی ایمرجنسی فون کرنا ہے تو وہ اسکول کے ٹیلی فون کے ذریعہ اساتذہ سے بات کرسکتے ہیں۔ بسواراج نے بتایا کہ پڑھائی کے دوران اساتذہ کو فون کا استعمال اگر پڑھائی کے مفاد میں ہے تو جائز ہے لیکن اپنے گھروالوں سے باتیں کرنا یا سوشیل میڈیا پرچاٹ کرنا اس کی ہرگز اجازت نہیں ہے۔ اساتذہ کے اس عمل سے بچوں کی توجہ پڑھائی ہے ہٹ سکتی ہے جس سے ان کی پڑھائی پر اثر پڑسکتا ہے۔ تاہم یہ بنگلور کے اسکولوں کے لئے کوئی نئی پالیسی نہیں ہے۔ اکثر اسکولوں میں اساتذہ کو اسکول کے احاطہ اور کلاس روم میں موبائل فون لے جانا ممنوع ہے۔ وہ اس کا استعمال صرف اسٹاف روم میں کرسکتے ہیں۔اس سلسلہ میں شہر کی سیٹو گریہا اسکول کی پرنسپال نے بتایا کہ اس کا عمل ہماری اسکول میں تقریباً3؍ سے 4؍ سال سے چل رہا ہے جب سے ا سمارٹ فون مشہورہوا تھا۔ اسکول میں اس کے استعمال سے اساتذہ اور بچوں دونوں کو نقصان ہوتا ہے۔ اس سرکیولر میں اسکولوں میں فون کا بچوں کے استعمال کے بارے میں کچھ بتایا نہیں گیا ہے ۔ جب ان سے پوچھا گیا تو محکمہ تعلیمات کے سینئر افسران نے بتایا کہ اکثر سرکاری اسکولوں میں بچے فون کا استعمال نہیں کرتے اور ہم اس ماحول کو نجی اسکولوں میں لانا چاہتے ہیں۔ انہوں نے بتایا کہ پڑھائی کے دوران کسی کی بھی طرف سے فون کا استعمال غلط ہے جس کے لئے ہر ماں باپ کو اپنے بچے پر نظر رکھنا ضروری ہے۔