بنگلورو،18؍دسمبر، (ایس او نیوز) وزیر مالگزاری آر وی دیش پانڈے نے آج ریاستی اسمبلی کو بتایاکہ ریاست بھر میں اراضی سروے کی ذمہ داری ادا کرنے کے لئے محکمے کی طرف سے 800نئے سرویرس کا تقرر کیا گیا ہے۔ وقفۂ سوالات میں جے ڈی ایس رکن اسمبلی ایچ وشواناتھ کے سوال کا جواب دیتے ہوئے انہوں نے کہاکہ ان سرویرس میں سے 33کو میسور ضلع میں تعینات کیا جارہاہے، اور تین کو خاص طور پر وشواناتھ کے ہنسور حلقے میں تعینات کیا جائے گا۔ ان سرویرس کی مدد سے ریاست بھر کی سرکاری زمین کا سروے کرنے میں مدد ملے گی۔ اس سے قبل وشواناتھ نے کہاکہ دیوراج ارس کے دور حکومت سے اب تک سروے کا کام مکمل نہ ہونے کی وجہ سے کروڑوں روپیوں کی املاک کے عوض مالکوں کو حق پترے نہیں دئے گئے ہیں۔ ایک اور سوال کے جواب میں جو رام نگرم ضلع کے برڈی ہوبلی میں آنے والے بلی کیمپنا ہلی دیہات میں موجود چامنڈیشوری بلو ٹیک کمپنی کی طرف سے سرکاری زمین پر غیر قانونی قبضے کے متعلق تھا۔ مسٹر دیش پانڈے نے کہاکہ سرکاری زمین پر غیر قانونی قبضے کو ختم کرانے اور زمین حکومت کی تحویل میں لینے کے لئے کارروائی کی گئی ہے۔ حکومت نے 20.33 ایکڑ زمین اپنے قبضے میں کرلی ہے، باقی 77.19 ایکڑ زمین پر ایگل ٹن پراجکٹس نامی کمپنی کا قبضہ برقرار ہے۔ اگر یہ کمپنی زمین اپنے قبضے میں رکھنا چاہتی ہے تو اسے حکومت کو 982.7کروڑ روپے ادا کرنے ہوں گے۔ کمپنی سے کہا گیا ہے کہ جلد از جلد وہ مذکورہ رقم ادا کرے۔ انہوں نے کہاکہ اس سلسلے میں کمپنی ہائی کورٹ سے رجوع ہوئی ہے۔ معاملہ نپٹانے تک حکومت اس معاملے میں کچھ نہیں کرسکتی۔