جے ڈی ایس کارکنوں میں اختلافات کا دیوے گوڈا کو اعتراف
بنگلورو،23؍اکتوبر(ایس او نیوز)سابق وزیراعظم اورجے ڈی ایس کے قومی صدر ایچ ڈی دیوے گوڈا نے اعتراف کیا ہے کہ ضمنی انتخابات کے لئے کانگریس اور جے ڈی ایس کے مابین مفاہمت کو لے کر پارٹی کارکنوں میں اختلاف رائے ، لیکن اس کے باوجود انہوں نے یقین ظاہر کیا کہ شیموگہ پارلیمانی حلقے سے جے ڈی ایس اور کانگریس کے مشترکہ امیدوار مدھو بنگارپا کی کامیابی ہوگی۔
آج شیموگہ کے پترا کرترا بھون میں ایک اخبار ی کانفرنس سے خطاب کرتے ہوئے سابق وزیراعظم نے کہاکہ کانگریس اور جے ڈی ایس قائدین میں باہمی تبادلۂ خیال کے بعد ہی امیدوار کو میدان میں اتارا گیا ہے، مقامی سطح پر کارکنوں میں ہوسکتا ہے کہ کچھ اختلاف ہو، لیکن ان اختلافات سے بالا تر ہوکر کامیابی کے لئے جدوجہد کرنی چاہئے۔ انہوں نے کہاکہ پچھلے اسمبلی انتخابا ت میں کانگریس اور جے ڈی ایس ایک دوسرے کے مقابل رہے ، لیکن معلق اسمبلی کے قیام کے سبب فرقہ پرست بی جے پی کو اقتدار سے باہر رکھنے کے واحد مقصد سے کمار سوامی کی قیادت والی مخلوط حکومت قائم ہوئی ہے۔ پانچ حلقوں کے ضمنی انتخابات میں بھی دونوں پارٹیوں کا یہ اتحاد برقرار ہے۔
سابق وزیر اعظم نے سابق وزیراعلیٰ آنجہانی ایس بنگارپا کو خراج عقیدت پیش کرتے ہوئے کہاکہ بنگارپا کے تعلق سے بی جے پی کو کچھ بھی کہنے کا اخلاقی حق نہیں ہے۔ بی جے پی میں بنگارپا کو جس ندامت کا سامنا کرنا پڑا اس سے تنگ آکر بنگارپا جے ڈی ایس میں شامل ہوگئے اور آخری دم تک اسی پارٹی سے وابستہ رہے ۔ بی جے پی والوں نے بنگارپا سے جو بدسلوکی کی بہتر ہے کہ اسے عوامی منظر پر لانے کی زحمت انہیں نہ دی جائے۔ ورنہ بی جے پی کے کئی رہنمابے نقاب ہوجائیں گے۔
دیوے گوڈا نے کہاکہ کرناٹک میں کانگریس اور جے ڈی ایس کا اتحاد آنے والے لوک سبھا انتخابات میں بھی برقرار رہے گا۔ کرناٹک میں ضمنی انتخابات کے نتائج کے ساتھ ملک کی پانچ ریاستوں میں جاری انتخابات کو اگلے پارلیمانی انتخابات کا سیاسی نقیب قرار دیتے ہوئے سابق وزیراعظم نے کہاکہ ان انتخابات کے ذریعے ملک کے عوام کو یہ پیغام ملے گا کہ اگلے چھ ماہ میں انہیں کیا موقف اپنا نا ہے۔انہوں نے کہاکہ پارٹی میں ہاسن ،منڈیا اور دیگر چند اضلاع میں کانگریس جے ڈی ایس اتحاد کو لے کر جو اختلافات ہیں ان تمام کو سلجھا لیا جائے گا۔
لوک سبھا انتخابات کے بعد کانگریس کی قیادت والے اتحاد کو اکثریت ملنے کی صورت میں راہل گاندھی کے وزیراعظم بننے کے متعلق سوال پر دیوے گوڈا نے کہاکہ راہل گاندھی کے وزیراعظم بننے میں ہرج کیا ہے، وہ نوجوان ہیں ملک کے لئے کچھ کرنے کی امنگ ان میں ہے۔ اگر عوام نے موقع دیاتو انہیں کیوں کر روکا جائے گا۔ اس موقع پر دیوے گوڈا کے ہمراہ سابق وزیر کاگوڈ تمپا ، جے ڈی ایس امیدوار مدھو بنگارپا اور دیگر کانگریس اور جے ڈی ایس لیڈران بھی موجود تھے۔