روہتک،21فروری(ایس او نیوز/آئی این ایس انڈیا)روہتک پولیس نے جاٹ تحریک کے دوران وزیر اعظم کے خلاف متنازع بیان دینے والے نوجوان کے خلاف غداری کا کیس درج کیا ہے۔پولیس نے یہ کیس پیر رات میں درج کیا ہے۔جسیا میں چل رہے دھرنے کے دوران 19فروری کو بلی دان دوس منایا جا رہا تھا۔اس دوران دھرنے پر سومویر جسیا نامی نوجوان نے وزیر اعظم کے خلاف متنازع بیان دیا تھا،جس کے بعد پولیس نے سومویر کے خلاف کیس درج کیا ہے۔اس کی تصدیق پیر کو رات میں پولیس سپرنٹنڈنٹ پنکج نین نے پانی پت میں جاٹ لیڈروں اور حکومت کے درمیان مذاکرات ختم ہونے کے بعد کی۔واضح رہے کہ پیر کو پانی پت میں حکومت اور جاٹ لیڈروں کے درمیان دوسرے مرحلے کے مذاکرات ہوئے تھے۔حکومت کی طرف سے بنائی گئی مذاکرات کمیٹی کے رکن چاہتے تھے کہ جاٹ لیڈر 29جنوری سے چل رہے دھرنے کو فوری طور پر ختم کر دیں لیکن جاٹ لیڈروں نے واضح کر دیا کہ جب تک ان کے تمام مطالبات کو پورا نہیں کیا جاتا ہے،تب تک دھرنے چلتے رہیں گے،تاہم حکومت اور جاٹ لیڈروں کے درمیان معاوضہ رقم اور کیس کو لے کر اتفاق بن گیا ہے۔