نئی دہلی،13؍ستمبر(ایس او نیوز؍آئی این ایس انڈیا)اس وقت ملک کی تکثیریت اور فرقہ وارانہ ہم آہنگی کو سبوتاژ کرنے والی طاقتیں سرگرم ہیں ۔جمعیۃ علماء ہند اپنی روایت کے مطابق ہمیشہ محبت اور امن کی بنیاد پر مبنی فضاء قائم کرنے کی جد وجہد کرتی رہی ہے، ساتھ ہی اس بات کی بھی ضرورت ہے کہ ملت اسلامیہ کو درپیش مسائل پر بحث و تمحیص کرکے ایک مضبوط اور مستحکم لائحہ عمل طے کیا جائے ۔ ان اہم ترین احساسات کے ساتھ جمعےۃ علما ء ہند کے جنرل سکریٹری مولانا محمود مدنی نے یہاں نئی دہلی میں اعلان کیا کہ جمعےۃ علماء ہند کی سب سے بڑی دستوری جنرل باڈی ’’مجلس منتظمہ ‘‘کا اہم اجلا س 27,28اکتوبر کو لکھنؤ میں منعقد ہوگا اوراسی موقع پر 29اکتوبر امن ایکتا سمیلن‘‘کا انعقاد بھی عمل میں آئے گا،جس میں مختلف عقائد سے وابستہ مذہبی رہنماؤں اور دانشوروں کو مدعو کیا جائے گا ، اس سمیلن میں اسلام کے عالم گیر پیغا م اخوت کی روشنی میں سبھی طبقات کے ساتھ محبت بانٹنے کے نکات پر توجہ مرکوز ہو گی ۔ واضح ہو کہ دہلی کے اندرا گاندھی اسٹیڈیم میں اسی ماہ (21ستمبر) کو ہونے والی کانفرنس موخر کردی گئی تھی،اب اس کی نئی تاریخ جمعےۃ علماء ہند کے مرکزی دفتر میں 11؍ستمبر ( پیر ) کو امیر الہند مولانا قاری سید محمد عثمان منصورپوری( صدر جمعےۃ علماء ہند ) کے زیر صدارت منعقد ورکنگ گروپ میٹنگ میں طے پائی ہے ، میٹنگ میں اجلاس مجلس عاملہ ، مجلس منتظمہ وغیرہ سے متعلق بھی لائحہ عمل طے ہوا ۔ 27؍اکتوبر کو اجلاس مجلس عاملہ اور28کو اجلاس مرکزی مجلس منتظمہ منعقد ہو گا۔ مولانا مدنی نے کہا کہ اجلاس مجلس منتظمہ ، تنظیم کے دستوری تقاضوں کی تکمیل کے لیے بھی منعقد ہوتا ہے ، جس میں تنظیم سے متعلق فیصلے لیے جاتے ہیں، اس کے علاوہ ہمارے سامنے کئی اہم مسائل ہیں جن میں خاص طو رسے قومی یکجہتی کے فروغ اور فرقہ پرستی کی روک تھام سے متعلق لائحۂ عمل،فرقہ وارانہ فسادات کی روک تھام کے لیے قانون سازی ،مسلمانو ں کے لیے ریزرویشن اور اس میں ہونے والی پیش رفت ،دہشت گردی کے انسداداور بے قصور افراد کی رہائی کے لیے موثر اقدامات ، مسلمانوں کے عائلی مسائل ،قانون شریعت کے تحفظ کے لیے جد وجہد ، ملی وقومی معاملات میں مسلکی تنازعات سے اوپر اٹھ کر باہمی اتحاد،دلت مسلم اتحاد سے متعلق لائحہ عمل ،عالم اسلام بالخصوص یمن و فلسطین اور بالخصوص روہنگیا کے مسلمانوں کے خلاف نسل کشی کی روک تھام جیسے کئی بنیادی مسائل اور تقاضے ہیں، جن پر غور کرکے آگے کے اقدامات سے متعلق فیصلے کیے جائیں گے ۔اجلاس کی تیاری کے سلسلے میں جمعےۃ علماء اترپردیش کے صدر مولانا متین الحق اسامہ نے کہا کہ صوبہ کی تمام یونٹوں خصوصا لکھنؤ و اطراف کے ضلعی ذمہ داروں سے کو متوجہ کیا گیا ہے وہ اجلاس کوکامیاب بنانے کے لیے اپنے حصہ کی ذمہ داری نبھائیں ۔