اسرائیل نے دہشت گردی سے حفاظت کے لیے ہندوستان کو غیر مشروط مدد کی پیشکش کی
نئی دہلی،20 فروری(ایس او نیوز؍آئی این ایس انڈیا)اسرائیل نے ہندوستان کو خاص طور پر دہشت گردی کے خلاف خود کا دفاع کرنے کے لئے بغیر شرط مدد کی پیشکش کرتے ہوئے زور دیا ہے کہ اس کی مدد کی کوئی حد نہیں ہے۔ اسرائیل کی یہ یقین دہانی اس بڑھتی ہوئی مانگ کے پس منظر میں خاصا اہم ہے کہ حکومت دہشت گردانہ حملوں سے نمٹنے کی اسرائیلی طریقہ کار پر غور کرے۔اسرائیل کے سفیر ڈاکٹر رون ملکا کا تبصرہ ایک سوال کے جواب میں آیا کہ ان کا ملک دہشت گردی سے متاثرہ ہندوستان کی کس حد تک مدد کر سکتاہے۔جمعرات کو جموں کشمیر میں ایک شدید دہشت گردانہ حملے میں سی آر پی ایف کے 40 جوان شہید ہو گئے تھے۔اس دہشت گردانہ حملے کو پاکستان میں واقع دہشت گرد تنظیم جیش محمد نے انجام دیا تھا۔اس دہشت گردانہ حملے کے بعد یہ مطالبہ زور پکڑ رہا ہے کہ حکومت کو دہشت گردی کے خلاف مہم کے لئے اسرائیل کی طرف اپنائے جانے والے طریقوں پر غور کرنا چاہئے۔قابل ذکر ہے کہ اسرائیلی فوج اپنی درست اور فوری کارروائی کے لئے دنیا میں مشہور ہے،ملکا نے گزشتہ ہفتے ایک انٹرویو میں کہاکہ ہندوستان کو اپنی حفاظت کے لئے جو ضرورت ہے، اس کی کوئی حد نہیں ہے،ہم اپنے قریبی دوست ہندوستان کو خاص طور پر دہشت گردی کے خلاف دفاع کرنے میں مدد کرنے کے لئے تیار ہیں کیونکہ دہشت گردی عالمی مسئلہ ہے، نہ کہ صرف ہندوستان اور اسرائیل کی۔انہوں نے زور دیا کہ دنیا کو تعاون کرکے دہشت گردی سے لڑنا چاہئے اور اسے ختم کرنا چاہئے۔انہوں نے کہاکہ اس لئے ہم ہندوستان کی مدد کرتے ہیں، آپ کی معلومات شیئر کرتے ہیں، اپنی ٹیکنالوجی شیئر کرتے ہیں کیونکہ ہم واقعی اپنے دوست کی مدد کرنا چاہتے ہیں۔ملکا (52) پہلے اسرائیل کی فوجی سروس میں تھے اور وہاں سے ’’فل کرنل‘‘ عہدے سے ریٹائرڈ ہوئے۔انہوں نے کہا کہ وزیر اعظم نیتن یاہو نے انہیں بتایا کہ ہندوستان ایک اہم ساتھی، بہت اہم دوست ہے اور وہ تعلقات اور مضبوط بنانے کے لئے تعاون کرنا چاہتے ہیں۔اپنی معلومات شیئر کرنے کیلئے انہوں نے کہا کہ ہندوستان کو مضبوط کرکے، اسرائیل عالمی ماحول میں شراکت دے رہا ہے کیونکہ عالمی استحکام میں ہندوستان کا اہم کردار ہے،ہم صرف دنیا کو رہنے کے لئے ایک بہتر جگہ بنانے کے لئے ایسا کر رہے ہیں۔ پلوامہ حملے کے بعد ملکہ نے بھی ٹویٹ کیا تھا کہ اسرائیل پلوامہ میں دہشت گردانہ حملے کی سخت مذمت کرتا ہے اور اس مشکل گھڑی میں اپنے ہندوستانی دوستوں کے ساتھ کھڑا ہے،وہ سی آر پی ایف جوانوں کے خاندانوں، ہندوستان کے لوگوں اور حکومت ہند کے تئیں اپنی گہری تعزیت کا اظہار کرتا ہے۔