ریاست میں بی جے پی کو مضبوط کرنے کیلئے منظم سازش،سدرامیا کے قریبی وزراء کے ٹھکانوں پر انکم ٹیکس کے چھاپوں کی تیاری
بنگلورو،7؍اکتوبر(ایس او نیوز) آنے والے اسمبلی انتخابات میں ریاست کے ایسے کانگریس لیڈران اور وزراء کی نشاندہی کرکے ان کے ٹھکانوں پر انکم ٹیکس کے چھاپے مارنے کی سازش رچی گئی ہے، جو کانگریس کیلئے انتخابات میں اہم کردار ادا کرسکتے ہیں،اور پارٹی کیلئے مالی وسائل یکجا کرنے کا سبب بن سکتے ہیں ۔معتبر ذرائع نے بتایاکہ مرکزی حکومت کی طرف سے کسی بھی حال میں اگلے انتخابات کے دوران کرناٹک میں بی جے پی کی بالا دستی حاصل کرنے کیلئے یہ سازش رچی گئی ہے، تاکہ کانگریس کی معاشی طاقت کو کمزور کیاجاسکے۔ خاص طور پر وزیر اعلیٰ سدرامیا سے قریبی سمجھے جانے والے وزراء کو نشانہ بنانے کی تیاری کی جاچکی ہے۔ ذرائع کے مطابق حال ہی میں اسی سازش کے تحت وزیر توانائی ڈی کے شیوکمار کے ٹھکانوں پر دھاوے بولے گئے ،لیکن اس کے بعد بی جے پی کو منہ کی کھانی پڑی، جب ڈی کے شیوکمار کے گھر سے پانچ چھ کروڑ روپیوں کی نقد رقم کے علاوہ کچھ ہاتھ نہیں لگا۔ بتایاجاتا ہے کہ بی جے پی کے قومی صدر امیت شا کی ہدایت پر مرکزی حکومت نے سدرامیا کے قریبی سمجھے جانے والے وزراء کی فہرست تیار کرکے محکمۂ انکم ٹیکس کے حوالے کی ہے اور آنے والے دنوں میں ان وزراء کو نشانہ بنانے کا حکم دیا گیا ہے۔ یہ بھی کہاجارہا ہے کہ حال ہی میں رکن کونسل گووند راج کے ٹھکانوں پر چھاپوں کے دوران محکمۂ انکم ٹیکس نے جو ڈیری برآمد کی ہے اس کے مشمولات کی بنیاد پر وزراء کو نشانہ بنایا جائے گا۔ تاہم کانگریس قائدین نے مرکزی حکومت کی طرف سے اس طرح کے چھاپوں کی صورت میں سیاسی انتقام کے جذبے کو عوام کے سامنے بے نقاب کرنے کی بھی تیاری کرلی ہے۔