مڈیکیرے27؍اپریل (ایس او نیوز) سابق وزیر مالیات کے بہن زادوں وشواناتھن اور ساتھپّن کی ملکیت والی کی شہرت یافتہ کمپنی خوشحال نگرکےSLN Group کی کُل 11شاخوں پر انکم ٹیکس ڈپارٹمنٹ کے افسران نے بیک وقت انتہائی خفیہ چھاپہ مارا ، جس کے بعد کچھ خاص قسم کے دستاویزات ضبط کیے جانے کی اطلاع موصول ہوئی ہے۔

SLN Groupکمپنی کے۱۱ مقامات پر بیک وقت بڑے منصوبہ بند اور خفیہ انداز میں چھاپہ ماری کے لئے میسور ڈسٹرکٹ پولیس کا تعاون لیا گیاتھا اور مقامی پولیس کو اس کی بھنک بھی لگنے نہیں دی گئی تھی۔اس کے علاوہ چھاپے کے لئے نکلنے والی50سے زیادہ گاڑیوں کوپھولوں سے اس طرح سجایا گیا تھا جیسے کسی شادی کی پارٹی میں شامل ہونے کے لئے بارات نکلی ہو۔ یہاں تک کہ سب سے آگے والی انووا کار کے ونڈ اسکرین پر دولھا دلہن کے نام Dheeraj and Kajal لکھا ہوا بورڈ بھی لگایا گیا تھا۔چھاپہ مارنے والی ہر ٹیم میں تقریباً15افسران شامل تھے۔

پتہ چلا ہے کہ صبح ۸ بجے کے وقت جب انکم ٹیکس افسران نے وشواناتھن اور ساتھپن کے مکانات پر چھاپہ مارا تو وہ لوگ اپنے دفتر کے لئے نکلنے کی تیاری میں تھے۔گمان کیا جاتا ہے کہ پچھلے دنوں چنئی میں پی چدمبرم کے بیٹے کارتھی کے دفتر پر انکم ٹیکس کے جو چھاپے پڑے تھے، اور وہاں سے جو معلومات افسران کو ملی تھیں ، اسی پس منظرمیں اب چدمبرم کے بھانجوں کے یہاں یہ چھاپے مارے گئے ہیں۔آئی ٹی افسران نے کورگ اور چینئی کے جن مقامات پر چھاپے مارے ہیں ان میں کافی کیورنگ یونٹ، انسٹانٹ کافی یونٹ، ٹمبریارڈ، پٹرول بنک، Purple View نامی لگژری ہوٹل وغیرہ شامل ہیں۔