پہلی بار راج بھون عوام کے لئے کھولا جائے گا
بنگلورو،7؍اگست(ایس او نیوز) اب تک صرف اہم شخصیتوں کے لئے ہی اپنی رسائی محدود رکھنے والا کرناٹک راج بھون جشن آزادی کے موقع پر 16 سے 31اگست تک عوام کے لئے کھول دیا جائے گا۔
دہلی میں راشٹر پتی بھون کے طرز پر راج بھون کو بھی 16 سے 31 اگست کے درمیان روزانہ شام چار سے ساڑھے چھ بجے تک عوام کے لئے کھلا رکھا جائے گا۔ راج بھون میں عوام کا داخلہ حالانکہ مفت ہوگا، لیکن اس کے لئے عرضی آن لائن بکنگ کے ذریعے داخل کرنی ہوگی۔
آن لائن بکنگ کے بعد راج بھون سے جن لوگوں کو باضابطہ ای میل یا ایس ایم ایس کے ذریعے مدعو کیا جائے گا ۔ مقررہ تاریخ پر وہی راج بھون جاسکیں گے۔ روزانہ بیک وقت 30افرادکو راج بھون میں داخلہ دیا جائے گا۔اور 20 سے 30 منٹ تک یہ گروپ راج بھون کا مشاہدہ کرسکتا ہے۔ عوام کے لئے راج بھون کی نمائش کے دوران عوام کو ہر طرح کی سہولت مہیا کرانے کے لئے بھی بی بی ایم پی سے مدد لی گئی ہے۔
کرناٹک کے راج بھون کی بنیاد انگریز حکومت کے کمشنر مارک کبن نے رکھی تھی۔ 42380مربع فیٹ زمین پر تعمیر اس عمارت کو آزادی کے بعد راج بھون کا نام دیا گیا۔ راج بھون کی خصوصیات میں گلاس ہاؤز اور 16ایکر پر مشتمل اس کے خوبصورت باغات شامل ہیں ۔ راج بھون میں داخلے کے لئے آن لائن عرضی کے مرحلے میں شناختی دستاویز کو لازمی قرار دیا گیا ہے۔