ہبلی :چوری کی 16وارداتیں انجام دینے والا ملزم گرفتار
ہبلی16؍فروری (ایس او نیوز) ہبلی اور ہوسپیٹ پولیس تھانوں کے علاقے میں چوری کی 16وارداتیں والے ملزم کو پرانی ہبلی کی پولیس نے گرفتار کرلیا ہے او ر اس کے قبضے سے مسروقہ سونے او رچاندی کے زیورات برآمد کرلیے ہیں۔
موصولہ رپورٹ کے مطابق گرفتار چورکا نام محمد علی نعلبند بتایا جاتا ہے جو کہ آنند نگر کا رہنے والا ہے۔اس کے قبضے سے تقریباً 6لاکھ 90ہزار روپے مالیت کے221گرام وزنی سونے کے زیورات اور 764گرام وزنی چاندی کے زیورات برآمد کیے گئے ہیں۔پولیس کے بیان کے مطابق اب تک تفتیش کے دوران پرانی ہبلی میں ہوئی 5 اور ہوسپیٹ میں انجام دی گئی دو وارداتوں کا معاملہ حل ہوگیا ہے۔ بقیہ وارداتوں کے تعلق سے مزید تفتیش جاری ہے۔ بتایا جاتا ہے کہ محمد علی گزشتہ دس برسوں سے لاپتہ تھا اور مکانات میں چوریوں کی وارداتیں انجام دے رہاتھا۔ ایسے ماہر چور کو گرفتار کرنے پر ہبلی دھارواڑ پولیس کمشنر ایم این ناگراج نے پرانی ہبلی کے پولیس افسران کی ستائش کی ہے۔