کلبرگی میں پارچہ جات پارک کی تعمیر تیزی سے ہوگی: وزیراعلیٰ کمار سوامی
بنگلورو،19؍دسمبر(ایس او نیوز) وزیر اعلیٰ ایچ ڈی کمار سوامی نے آج ریاستی اسمبلی کو بتایا کہ ریاست میں پارچہ جات کی صنعت کو فروغ دینے کے لئے کلبرگی میں زیر تعمیر پارجہ جات صنعتی پارک کے کام میں غیر معمولی تیزی لائی جائے گی۔ وقفۂ سوالات میں بی جے پی رکن بسوا راجو متی مڑا کے سوال کا جواب دیتے ہوئے کمار سوامی نے کہاکہ مرکزی حکومت کے اشتراک سے کلبرگی میں پارچہ جات ٹیکنالوجی پارک قائم کیا جارہاہے۔
انہوں نے کہاکہ اس کے لئے ریاستی اور مرکزی حکومت نے مشترکہ طور پر ایک علیحدہ ایجنسی قائم کی ہے۔ یہاں کے نندور، کیسرہٹاگی ، صنعتی علاقے میں 50ایکڑ زمین پر یہ پارچہ جات پارک قائم کرنے کی منظوری دی گئی ہے۔ اس کے لئے جو رہنما خطوط وضع کئے گئے ہیں اسی کے مطابق بنیادی ڈھانچہ فراہم کرنے کے لئے مرکزی حکومت سے 40 فیصد گرانٹ حاصل کرنے کی گنجائش ہے۔ پارچہ جات پارک ترتیب دینے کا تخمینہ 49کروڑ روپیوں کا ہے، اس میں سے مرکز سے 18 کروڑ روپیوں کی رقم حاصل کی جاسکتی ہے۔ اس میں سے مرکزی حکومت نے اب تک صرف 1.85 کروڑ روپے فراہم کئے ہیں۔ وزیر اعلیٰ نے کہا کہ فوری طور پر ریاستی حکومت کی طرف سے اس پارک کے لئے دس کروڑ روپے مہیا کرائے جائیں گے۔