موسلادھار بارش نے کسانوں کے چہروں پر خوشی بکھیر دی
بنگلورو،27؍مئی(ایس او نیوز) ریاست کی راجدھانی بنگلور سمیت مختلف مقامات پر ہوئی بارش سے جہاں لاکھوں روپیوں کا مالی نقصان ہوا ہے وہیں اس بارش کی شروعات سے خشک سالی کے سبب پریشان کسانوں کے چہروں پر مسکراہٹ لوٹ آئی ہے۔ میسور ، اور ننجگڈھ میں کل ہوئی موسلادھار بارش کے سبب ننجنگڈھ میں پچاس سے زائد مکانوں میں پانی گھس پڑا۔ یہاں ایک پل کی دیوار ٹوٹ جانے کے سبب دیہات میں پانی گھس پڑا، فوری طور پر تحصیلدار اور ریوینیو افسران نے پہنچ کر عملے کی مدد سے پانی کو روکنے کے انتظامات کئے۔گنڈل پیٹ تعلقہ میں موسلادھار بارش کی وجہ سے کئی جھونپڑیاں بہہ گئیں۔ ٹمکور میں بھی ہوئی زور دار بارش کے سبب شٹ ہلی گیٹ انڈر پاس اور آس پاس کے نشیبی علاقوں میں پانی بھر جانے کی اطلاعات موصول ہوئی ہیں۔ کل دوپہر تک شدت کی گرمی سے پریشان ضلع کے عوام نے اس زور دار بارش سے راحت محسوس کی ہے۔ کولار ضلع میں بھی کل مختلف مقامات پر ہوئی بارش کے سبب ٹریفک کا نظام متاثر رہا اور کئی نشیبی علاقے زیر آب رہے۔ متعدد مقامات پر بجلی کی کٹوتی کی شکایات موصول ہوئیں۔چامراج نگر، کولیگال اور دیگر علاقوں میں بھی بارش کی اطلاعات ملی ہیں۔ریاست کے خشک علاقہ جہاں پچھلے پانچ سالوں سے ایک بوند بارش نہیں ہوئی تھی، کل رات کی بارش نے ان علاقوں کے کاشتکاروں کے چہروں پر خوشیاں لوٹا دی ہیں۔