’ پاکستان زندہ باد‘کے نعرے لگانے پرہاویری میں ایک شخص کو عوام نے پیٹا۔ بیلگاوی میں ٹیچرکا گھر نذرآتش۔ رائچور میں ہنگامہ
ہاویری 17؍فروری (ایس او نیوز) کشمیر کے پلوامہ میں دہشت گردانہ حملے میں ہلاک ہونے والے فوجیوں کو خراج عقیدت اور ان کے اہل خانہ کے ساتھ اظہار ہمدردی کے لئے دیوگیری کے عوام نے ایک مشعل بردار جلوس نکالاتھا اور جلوس کے شرکاء پاکستان مخالف نعرے بلند کررہے تھے۔ اس دوران ایک شخص نے ’پاکستان زندہ باد‘ کے نعرے لگانا شروع کیا تو ہجوم نے اسے بری طرح پیٹ ڈالا۔
موصولہ رپورٹ کے مطابق نعرے لگاتے ہوئے جلوس جب آگے بڑھ رہا تھا تو شراب کے نشے میں دھت محمد علی کیری مٹی ہلّی نامی شخص بھی جلوس میں شریک ہوگیا۔ اور پھر اس نے پاکستان مخالف نعروں کے جواب میں پاکستان کی حمایت میں نعرے بلند کیے۔ اس سے جلوس کے شرکاء برہم ہوگئے اور محمد علی کو بے رحمی سے پیٹنا شروع کیا۔جیسے ہی پولیس کو اس کی خبرملی تو اس نے وہاں پہنچ کر ملزم محمدعلی کو اپنی حراست میں لیتے ہوئے مشتعل ہجوم کو قابومیں کیا۔محمد علی کے خلاف پولیس نے کیس درج کرلیا ہے۔
بیلگاوی میں ٹیچر کا گھر جلادیا: بیلگاوی سے ملی اطلاع کے مطابق شیوا پورا نامی علاقے میں رہنے والی زلیخا نذیر صاب مادمداپورا(25سال) نامی ایک ٹیچر نے سنیچر کے دن فیس بک پر اپنا اسٹیٹس ’پاکستان زندہ باد‘ رکھ دیا۔اس سے ناراض مقامی لوگوں نے آس پاس کے گاؤں والوں کے ساتھ مل کر رات کے وقت زلیخا کے گھر کو نذر آتش کردیا۔پولیس نے اطلاع ملنے پر جائے وقوع پر پہنچ کر آگ بجھائی۔
معلوم ہوا ہے کہ فیس بک پر اسٹیٹس بدلنے کے خلاف عوام کے بھڑکتے ہوئے جذبات کو دیکھ کر زلیخا کے گھر والوں نے پہلے ہی اسے یاراگٹّی نامی گاؤں کے ایک ہوٹل میں چھپادیاتھا۔پولیس نے زلیخا کے خلاف کیس درج کرلینے کے بعد اسے گرفتار کرلیا ہے۔اس کے بعد بھی مقامی لوگوں نے دھرنا دیااور سڑک روک کر احتجاجی مظاہرہ کیا۔ ایم ایل اے آنند مامانی نے بھی مظاہرے کے مقام پر پہنچ کر ملزمہ کے لئے سخت ترین سزا کا مطالبہ کیا۔
رائچور میں ہنگامہ۔پولیس کالاٹھی چارج: جب کشمیر میں دہشت گردانہ حملے کے بعد مبینہ طور پر جشن مناتے ہوئے 15افراد کی ایک ٹولی نے رائچور ضلع کے تالیکھان گاؤں میں مٹھائیاں تقسیم کیں اور ایک دوسرے پر رنگ مَلتے ہوئے خوشی کا مظاہرہ کیاتو یہ خبر سوشیل میڈیا پر عام ہوگئی ۔جمعہ کی رات کو اس خبر کے عام ہوتے ہی آس پاس کے علاقوں سے ایک ہزار سے زیادہ نوجوان تالیکھان کی عبادت گاہ کے پاس جمع ہوگئے۔ وہاں پرزبردست احتجاجی مظاہرہ کیا۔ کچھ مظاہرین عبادت گاہ میں گھس گئے ۔ وہاں پر موجود لوٹے وغیرہ توڑ ڈالے اور کچھ کپڑوں میں آگ بھی لگادی۔
جب اس احتجاج اور ہنگامے کی اطلاع ملی تو پولیس نے موقع واردات پر پہنچ کر برہم ہجوم کو منتشر کرنے کے لئے لاٹھی چارج کا سہارا لیا۔اس کے علاوہ ہندوستانیوں فوجیوں کی شہادت پر جشن منانے کے الزام میں 6افراد کے خلاف کیس درج کرلیا۔جن میں سے خواجہ صاب، حسین صاب اور بُڈھے صاب کو گرفتار کرلیا گیا ہے اور بقیہ ملزمین کی تلاش جاری ہے۔
بنگلورو میں شکایت درج: کرناٹکا حامی تنظیم کے ایک رکن ناگیش راؤنے سنیچر کے دن سائبر کرائم پولیس اسٹیشن میں چند لوگوںکے خلاف شکایت درج کی ہے کہ انہوں نے فیس بک پر پلوامہ کے دہشت گردانہ حملے کو صحیح قرار دیا اور فوجیوں کے مارے جانے پر خوشی کا اظہار کیا ہے۔ناگیش نے اپنی شکایت میں حبیب ملک، عبدالحنیف، سلطان احمد، سلمان نثار، عامر شریف اور عمیر غوث کے نام درج کیے ہیں اور ان کے خلاف سخت ترین قانونی کارروائی کا مطالبہ کیا ہے۔
