حج بھون کو نام رکھنے کے سلسلہ میں ابھی فیصلہ نہیں ہوا:پرمیشور
بنگلورو،25؍جون(ایس او نیوز)حج بھون کو ٹیپو سلطان سے منسوب کرنے کے سلسلہ میں ابھی کوئی حتمی فیصلہ نہیں کیا گیا ہے ، یہ بات ریاستی نائب وزیر اعلیٰ ڈاکٹر جی پرمیشورنے کہی ۔ شہر میں اخباری نمائندوں سے گفتگو کرتے ہوئے انہوں نے کہا کہ ٹیپوسلطان کے سلسلہ میں بی جے پی کے قائدین پہلے بھی تنازعہ کھڑا کرچکے ہیں ، اب پھر ایک مرتبہ ٹیپوسلطان کے نام پر تنازعہ کو ہوا دینے کی کوشش کررہے ہیں ، بی جے پی غیر ضروری طور پر ٹیپو سلطان کے بارے میں باتیں کررہی ہے ۔ انہوں نے مزید کہا کہ حج بھون کو حضرت ٹیپوسلطان کے نام سے منسوب کرنے کے متعلق ریاستی وزیر اقلیت و حج بی زیڈ ضمیر احمد خان کے سامنے ان کے طبقہ کی جانب سے ایک تجویز پیش کی گئی تھی ۔ تاہم اس سلسلہ میں کوئی بھی فیصلہ قطعی و حتمی شکل میں نہیں کیا گیا ۔ شہر میں اخباری کانفرنس سے خطاب کرتے ہوئے ایڈی یورپا نے حج بھون کو ٹیپو سلطان کا نام رکھنے پر اعتراض جتاتے ہوئے کہ ٹیپو کے بجائے سابق صدر جمہوریہ ہنداے پی جے عبدالکلام کا نام رکھنے کے سلسلہ میں حکومت کو مشورہ دیا ،یہ بھی کہا تھا کہ اس ضمن میں وزیر اعلیٰ کمار سوامی اورنائب وزیر اعلیٰ پرمیشور سے ملاقات کروں گا۔