بارش کی تباہی سے نمٹنے کیلئے اقدامات کئے جائیں وزیر بنگلورو شہری ترقیات جی پرمیشور کی بی بی ایم پی افسروں کو ہدایت
بنگلورو،16؍ جولائی (ایس او نیوز) ریاست کے کاویری طاس والے علاقوں ، ملناڈ اور مغربی گھاٹ میں موسلادھار بارش ہورہی ہے جس کے سبب عام زندگی مفلوج ہوگئی ہے ۔ طوفانی ہواؤں کے ساتھ بارش ہونے کے سبب کئی درخت اور بجلی کے کھمبے گر گئے ہیں ۔
گزشتہ ایک ہفتہ سے کئی دیہاتیوں کو تاریکی میں راتیں گزارنی پڑرہی ہیں ۔ مہاراشٹرا میں زبردست بارش ہونے کی وجہ سے آلمٹی ڈلیم میں پانی کی سطح حد سے زیادہ بڑھ گئی ہے ۔ بلگام ضلع میں کرشنا ، دودگنگا، ویدگنگا ، ہیرنیاکیشی ندی زیر آب ہوگئی ہے ۔ ناگنور ۔ سنکیشور برڈج پانی میں ڈوب گیا ہے ۔ جس کے سبب مہاراشٹرا اور کرناٹک کے درمیان بس اور دیگر گاڑیوں کی نقل و حمل روک دی گئی ہے ۔
وزیر برائے بنگلورو شہری ترقیات و نائب وزیر اعلیٰ ڈاکٹر جی پرمیشور نے آج بروہت بنگلورو مہانگر پالیکے (بی بی ایم پی ) افسروں کی میٹنگ طلب کی اور شہر میں شدید بارش ہونے کے امکانات کے پیش نظر قبل از وقت اقدامات کرنے افسروں کو سخت ہدایت دی ۔ اس کے علاوہ کے آر ایس اور ہیماوتی ڈیم سے پانی خارج نہ ہونے کیلئے درکار مناسب انتظامات کرنے کی بھی ہدایت دی ہے ۔
