چھوٹی صنعتوں کی ترقی کیلئے 23نومبر سے عالمی سرمایہ کاری کانفرنس: دیش پانڈے
بنگلورو،23؍ اگست(ایس او نیوز)ریاستی وزیر صنعت آر وی دیش پانڈے نے کہا کہ ریاست میں چھوٹی اور بہت چھوٹی صنعتوں کو بڑھاوا دینے کے مقصد سے شہر میں 23تا25 نومبر تین روزہ عالمی سرمایہ کاری کانفرنس منعقد کی جارہی ہے۔ اس کانفرنس میں شرکت کیلئے ملک اور بیرونی ممالک کے معروف صنعت کاروں اور سرمایہ کاروں کو مدعو کیا جارہاہے۔ اس سہ روزہ کانفرنس کی بدولت ریاست میں چھوٹی اور درمیانی درجے کی صنعتوں میں سرمایہ کاری کی طرف بین الاقوامی سرمایہ کاروں کو راغب کرایا جائے گا اس مقصد کے تحت ریاستی حکومت نے مختلف ممالک میں عالمی سرمایہ کاری کانفرنس کے بارے میں روڈ شو کے اہتمام کا فیصلہ کیاہے، اس کانفرنس کے ذریعہ ریاست میں روزگار کے نئے مواقع ہموار کئے جائیں گے اور ریاست میں صنعتی ترقی کے منصوبوں کو عملی جامہ پہنانے ایک جامع پالیسی مرتب کرنے کیلئے اس کانفرنس کے ذریعہ پہل کی جائے گی۔ انہوں نے کہاکہ ریاست میں کھلونو ں ، الیکٹرانک ، موبائیل فون ٹیابلٹ وغیرہ کی صنعتوں کو بڑھاوا دیا جائے گا۔ 2016کے دوران ریاست میں 1.54لاکھ کروڑ روپیوں کا سرمایہ لگایا گیا اس اعتبار سے کرناٹک صنعتی شعبے میں سرمایہ کاری کے محاذ پر ملک میں سر فہرست ہے۔ انہوں نے کہاکہ آنے والے دنوں میں مزید 1.40لاکھ کروڑ روپیوں کی سرمایہ کاری یقینی بنانے کا منصوبہ ہے اس سے اگلے چار سال میں چالیس ہزار سے زائد نئے روزگار قائم کئے جاسکتے ہیں۔ انہوں نے کہاکہ ریاستی حکومت کا منصوبہ ہے کہ صنعتی پراجکٹوں کو تیزی سے مکمل کرکے ریاست میں ان کی تعداد کو بڑھا کر بارہ تا چودہ لاکھ کردیاجائے اور یہاں پر روزگار کے نئے نئے مواقع مہیا ہوسکیں۔ بنگلور کے علاوہ کنکا پورہ ، بلاری ، دھارواڑ ، کلبرگی ، میسور اور منگلور میں ان منصوبوں کو عملی شکل دی جائے گی۔