گوری لنکیش اور کلبرگی قتل کیس کی چارج شیٹ جلد
بنگلورو،12؍جنوری(ایس او نیوز) معروف کنڑا ادیب اور محقق ڈاکٹر ایم ایم کلبرگی اور صحافی گوری لنکیش کے قتل کے سلسلے میں دس مشتبہ ملزمین کے خلاف چارج شیٹ جلد ہی دائر کردی جائے گی۔
سی آئی ڈی کے ذرائع نے اس کی تصدیق کی اور بتایاکہ ملزمین کے خلاف چارج شیٹ تیار کرنے کا عمل جاری ہے۔ یہ بھی بتایا کہ ان دونوں کے قتل کی تحقیقات قطعی مراحل میں ہیں۔ مشتبہ ملزمین سدھنوا ، راجیش بنگیر ، امول کالے، گنیش مسکین، رام چندرا بدّی، امت داگویکر، بھارت کورنے، سجیت اور شرتھ کے خلاف یہ چارج شیٹ داخل کی جائے گی۔
سی آئی ڈی ذرائع نے بتایاکہ تحقیقات سے پتہ چلا ہے کہ دونوں کو مارنے کے لئے ایک ہی پستول استعمال میں لائی گئی۔ 30؍ اگست 2015 کو دھارواڑ کے کلیان نگر میں پروفیسر ایم ایم کلبرگی کو ان کی رہائش گاہ کے باہر مار دیاگیا، جبکہ گزشتہ 6 ستمبر 2017کو گوری لنکیش کو ان کی رہائش گاہ کے باہر گولی ماردی گئی۔ان دونوں معاملوں کی جانچ کو سی آئی ڈی کی خصوصی ٹیموں نے تکمیل تک پہنچادیا ہے، بہت جلد تمام ملزمین کے خلاف فرد جرم دائر کردیا جائے گا۔