بنگلورو، 5؍مارچ(ایس او نیوز؍آئی این این) گوری لنکیش قتل کیس میں گرفتار کئے گئے اسلحہ سپلائی کرنے والے ملزم کے ٹی نوین کمار سے پوچھ تاچھ کے دوران بنگلورو پولیس کی ایس آئی ٹی کو ایک اور قتل کی منصوبہ بندی کی بھنک لگی ہے۔ کے ٹی نوین موبائل فون کی جانچ پڑتال کے بعد تفتیش کار اُس پر اسرار شخص کی تلاش میں سرگرداں ہیں جو بنگلورو کے مختلف پی سی اوز سے نوین کو مسلسل فون کرتا رہا ہے۔ دلچسپ بات یہ ہے کہ اس شخص نے کبھی بھی اپنے ذاتی نمبر سے فون نہیں کیا کہ کہیں اس کی شناخت ظاہر نہ ہوجائے ۔ انڈین ایکسپریس کی ایک رپورٹ کے مطابق کے ٹی نوین کے موبائل فون کی جانچ کرنے پر پتہ چلا کہ اسے ایس ٹی ڈی نمبر 0824سے کافی عرصے سے کئی فون کالس آئے ہیں۔ جب مذکورہ نمبران کی جانچ کی گئی تو پتہ چلا کہ یہ بنگلورو میں مختلف پی سی اوز کے نمبر ہیں۔ پولیس کو شبہ ہے کہ کمار اسی پر اسرار شخص کی ہدایت پر کام کرتا ہے اور اگر اس تک رسائی ہوگئی تو گوری لنکیش کے قتل کی سازش اور اس پر عمل در آمد کے ملزمین تک آسانی سے پہنچا جاسکتا ہے۔ پولیس اس بات کی بھی جانچ کررہی ہے کہ کہیں یہ دونوں گوری لنکیش کی ہی طرح میسور میں مقیم معروف مصنف کے ایس بھگوان کے قتل کی منصوبہ بندی تو نہیں کررہے تھے۔ 

واضح رہے کہ بھگوان ان مصنّفین میں شامل ہیں جنہیں گوری لنکیش کے قتل کے بعد سیکوریٹی فراہم کی گئی ہے۔ بھگوان ہندو تواوادیوں اور مذہبی شدت پسندوں کے خلاف بے دھڑک اپنی رائے ظاہر کرنے کیلئے جانے جاتے ہیں۔ اخبار مذکور ہ کی رپورٹ کے مطابق تفتیشی ٹیم میں موجود ذرائع نے اسے بتایا ہے کہ کے ٹی نوین کمار نے فون کرنے والے مذکورہ مشتبہ شخص کے ساتھ مل کر اسی سال جنوری میں دوسرے قتل کی تیاری بھی کرلی تھی۔ تفتیش کار گزشتہ ماہ سے ہی کمار پر نظر رکھے ہوئے تھے۔ کے ایس بھگوان کو قتل کرنے کی منصوبہ بندی تفتیش کاروں کے اس موقف کی تائید کرتا ہے کہ گوری لنکیش کو ہندو تواوادیوں کے خلاف ان کے نظریات اور ان کے برملا اظہار کے سبب نشانہ بنایا گیا ہے۔ کے ٹی نوین کمار کے ایک دوست نے تفتیش کاروں کو بتایا ہے کہ گوری لنکیش کے قتل کے بعد جب بیرور میں کمار کے گھر پر اس نے اس سے ملاقات کی تھی تو کمار نے اسے بندوق کی گولیوں سے بھرا ہوا ایک ڈبہ دکھایا تھا اور بتایا تھا کہ ایک ’’بڑے آپریش‘‘ کیلئے ہے جو گوری لنکیش کے قتل جیسا ہی ہوگا۔ نوین کمار کی گرفتاری 2؍ مار کو عمل میں آئی تھی۔ اس کا تعلق ہندوانتہا پسند تنظیم سناتن سنستھا سے ہونے کے اشارے ملے ہیں۔ تفتیش کاروں کے مطابق اس کی تحویل سے سناتھ سنستھا کا کافی نظریاتی مواد برآمد کیا گیا ہے جس میں اس تنظیم کی کتاب اور اس کی تعلیمات شامل ہیں۔ 

کون ہے نوین کمار؟ کے ٹی نوین کمار شدت پسند ہندو تواوادی تنظیم ہندو یوا سینا کا بانی ہے۔ اس کے تعلقات بدنام زمانہ سناتن ساسنستھا سے بھی ظاہر ہوئے ہیں۔ پوچھ تاچھ کے دوران اس نے اسلحہ کے کاروبار سے اپنی وابستگی کا اعتراف کیا ہے اور شبہ ہے کہ گوری کے قتل میں استعمال ہونے والا اسلحہ نوین نے ہی فراہم کیا تھا۔