تبادلہ خیال کے بعد بجٹ پیشی کا فیصلہ:جی پرمیشور
بنگلورو17؍جون(ایس او نیوز) نائب وزیر اعلیٰ ووزیر برائے داخلہ ڈاکٹر جی پرمیشور نے کہا کہ نئی حکومت قائم ہونے کے بعد نیا بجٹ پیش کرنا عام بات ہے ۔ انہوں نے کہا کہ ہرایک حکومت کااپنے خصوصی پروگرامس ہوا کرتے ہیں جس کے تحت بجٹ پیش کیاجائے گا ۔ ڈاکٹر جی پرمیشور نے کہا کہ بجٹ کے سلسلہ میں کو آرڈینیشن کمیٹی میں تبادلہ خیال کرنے کے بعد قطعی فیصلہ کیا جائے گا۔ انہوں نے بتایا کہ جنتادل ( سکیولر) اور کانگریس کی مخلوط حکومت کے عام پروگرامس کس طرح سے ہونے چاہئیں اس سلسلے میں 10دن کے اندر رپورٹ پیش کرنے کیلئے کمیٹی کو حکم دیا گیا ہے ۔ انہوں نے بتایا کہ کو آرڈینیشن کمیٹی سے ملنے والی رپورٹ کی بنیادپر ہی بجٹ کے پروگرامس ترتیب دےئے جائیں گے۔ سداشیو نگر کی اپنی رہائش گاہ میں اخباری نمائندوں سے بات کرتے ہوئے نائب وزیر اعلیٰ نے کہا کہ بجٹ کے سلسلہ میں کوآر ڈینیشن کمیٹی کے چےئرمین سدرامیا کے ذہن میں کیا بات ہے اس کا انہیں علم نہیں ہے ۔ انہوں نے بتایا کہ عام پروگرامس کو ترتیب دینے کے سلسلے میں ایک کمیٹی بھی تشکیل دی گئی ہے۔ کمیٹی کی سفارشات پر بجٹ تیار کیا جائے گا۔