کولکاتہ:11/دسمبر (ایس او نیوز/آئی این ایس انڈیا)پانچ ریاستوں میں سے تین ریاستوں چھتس گڑھ، مدھیہ پردیش اورراجستھان میں کانگریس کی بہترکارکردگی سے’’بابوجی خوش ہیں‘‘۔ سابق صدرجمہوریہ پرنب مکھرجی کے صاحبزادے اورکانگریس کے ممبرپارلیمنٹ ابھیجیت مکھرجی نے میڈیااہلکاروں سے بات کرتے ہوئے کہا کہ صدر جمہوریہ منتخب ہونے کے بعد سے ہی پرنب مکھرجی سیاست سے کنارہ کش ہیں، گزشتہ 6 مہینے سے ریٹائرڈ ہونے کے باوجود بھی ماضی کی روایات کے مطابق وہ سیاست سے دورہیں اوران کا برسرعام سیاسی تبصرہ کرنا ناممکن ہے، مگر کانگریس کی کامیابی پروہ اپنے احساسات کو چھپا نہیں سکتے ہیں۔تین بڑی ریاستوں میں کانگریس کی جیت سے بنگال کانگریس کے لیڈروں کا خوش ہونا فطری بات ہے۔ ابھیجیت مکھرجی جنگی پورسے ممبر پارلیمنٹ ہیں۔ پہلے یہاں سے پرنب مکھرجی کامیاب ہوا کرتے تھے۔ نامہ نگاروں سے ابھیجیت مکھرجی سے پوچھا گیا کہ پرنب مکھرجی کا رویہ کیا ہے۔ اس پرانہوں نے کہا کہ برائے کرم میرے بیان کو شائع نہ کریں، مگر صحیح بات یہ ہے کہ میرے والد پرنب مکھرجی کانگریس کی جیت پر خوش ہیں اور یہ ان کے رویے سے ظاہر ہوتا تھا۔انہوں نے کہا کہ تین سال قبل پرنب مکھرجی نے کہا تھا کہ راہل گاندھی کیلئے کچھ مشکلات ہیں، مگروہ جلد ہی ملک کے لیڈر ہوں گے اور وہ ملک کے اگلے وزیراعظم ہوں گے۔ ابھیجیت مکھرجی جن کا آج یوم پیدائش ہے، نے کہا کہ یہ جیت ان کیلئے ایک بڑا تحفہ ہے۔ تاہم میری اہلیہ، بیٹی دہلی میں ہیں۔ چونکہ کل کانگریس کی ایک بڑی ریلی ہے، اس لئے میں کلکتہ میں ہوں۔بھیجیت مکھرجی نے کہا کہ کانگریسی کارکن کے طورپرآج کے دن جشن منانا فطری بات ہے۔ یہ سیمی فائنل جس میں ہماری جیت ہے اورفائنل میں بھی ہماری جیت ہوگی۔ مکھرجی نے کہا کہ ہندوستان کی یوم آزادی اوراس کیلئے جد وجہد ہمارے خون میں ہے۔ اس لئے ملک کو ہم سے بہترکوئی نہیں سمجھتا ہے۔ انہوں نے بنگال میں کانگریس کے اتحاد کرنے کے سوال پرکہا کہ یہ پارٹی اعلیٰ قیادت کرے گی۔