بنگلورو کے حج ہاؤس میں پہلی پرواز کی روانگی کا افتتاح 31؍جولائی کو؛وزیر اعلیٰ کمار سوامی‘ غلام نبی آزاد‘کے علاوہ دیگر اہم شخصیات کی شرکت متوقع
بنگلورو، 21جون(ایس او نیوز؍آئی این ایس انڈیا) اس سال حج کے لیے 18ہزاردرخواستیں موصول ہوئی ہیں جبکہ کرناٹک کیلئے صرف 6624کا کوٹہ منظور ہوا ہے۔جوقرعہ اندازی کے ذریعہ منتخب کیا جاتا ہے تقریباََ11ہزار درخواستیں ویٹنگ لسٹ میں ہیں ۔
یکم ؍اگست کو بنگلور سے حاجیوں کی پہلی حج پرواز کاآغاز ہوگا۔کُل 19پروازیں ہوں گی۔یکم ؍اگست سے3؍اگست تک تین پروازیں ہوں گی۔منگلور سے 21؍جولائی سے تین پروازیں اُڑان بھریں گی۔اور بنگلور کے حج ہاؤس میں پہلی پرواز کی روانگی کا افتتاح 31؍جولائی کو حج ہاؤس میں عمل میں آئے گا۔
اس افتتاحی پروگرام میں وزیر اعلیٰ کمار سوامی‘جناب غلام نبی آزاد‘کے علاوہ دیگر اہم شخصیات کی شرکت متوقع ہے۔
ان خیالات کا اِظہار جناب بی زیڈ ضمیر احمد خان ریاستی وزیر برائے خوراک و شہری رسدات امور اقلیت و اواف او رحج نے وکاس سودھا بنگلور میں اپنے متعلقہ محکمہ جات کے سنئیر عہدیداران جائزہ لینے کے بعد کہی۔ ۔جناب بی زیڈ ضمیر احمد خان نے کہا کہ کرناٹک اسٹیٹ وقف بورڈ کیلئے انتخابات کروانے کے سلسلہ میں فوری کارروائی کرنے کیلئے متعلقہ افسران کو ہدایت دی کیونکہ ایک عرصہ دراز سے وقف بورڈ کے انتخابات التواء میں پڑے ہیں ۔
ضمیر احمد خان نے وقف افسران کو یہ بھی ہدایت دی کہ وقف کی ان جائیدادوں کی نشاندہی کریں جن کو ڈیولپ کرکے آمدنی ذرائع بڑھاکر ا سکی آمدنی سے مسلم قوم کے بچوں کی تعلیم پر خرچ کیا جاسکے۔اوقاف کی بڑی بڑی جائیدادیں ہیں جن کو ترقی دی گئی تو قوم خودکفیل بن سکتی ہے‘اور حکومت سے مانگنے کی ضرورت نہیں پڑتی۔محکمہ اقلیتی بہبود سے متعلق جناب بی زیڈ ضمیر احمد خان نے بتایا کہ چیف منسٹر کرناٹک مسٹرایچ ڈی کمار سوامی مکمل طورپر نیا ریاستی بجٹ پیش کرنے کا منصوبہ رکھتے ہیں محکمہ اقلیتی بہبود و اوقاف میں اِضافہ کروانے کی وہ کوشش کریں گے۔
انھو ں نے کہا کہ کرناٹک مائنارٹیز ڈیولپمنٹ کارپوریشن اقلیتوں کیلئے ایک اہم ادارہ ہے لیکن اب بھی اس ادارہ میں دلالوں کا اثر ورسوخ چلتا ہے‘ ا سکو ختم کرنے کیلئے وہ مناسب اقدامات کریں گے۔اور مائنارٹیز ڈائریکٹوریٹ کی طرح تمام اسکیمات کو آن لائن کرنے کی انھو ں نے وکالت کی۔جناب بی زیڈ ضمیر احمد خان نے محکمہ خوراک و شہری رسدات سے متعلق کہا کہ نا بھاگیہ اسکیم کے تحت ہر ایک فرد کو دئیے جانے والے چاول میں مزید دو کیلو اضافہ کی تجویز حکومت کے سامنے پیش کی گئی ہے۔بہت جلد اس پر حتمی فیصلہ کیا جائے گا۔بی پی ایل راشن کارڈ میں ناموں کے اندراج کروانے کیلئے آدھار کالنک کروانا ضروری قرار دیا گیا تھا اس سے ہونے والے مشکلات و مسائل سے واقفیت کے بعد فوری طورپر کارروائی کرتے ہوئے مسائل حل کرلئے جائیں گے۔اور بی پی ایل راشن کارڈ کیلئے آدھار لنک کرنے کی معیاد میں توسیع کرنے کے متعلقہ عہدیداران سے بات کی گئی ہے۔توسیع کیلئے درکار اقدامات کئے جائیں گے۔انھوں نے بتایا کہ ریاست میں 47لاکھ بی پی ایل کارڈ کی تقسیم باقی ہے اس سلسلہ میں عہدیداران سے تفصیلات حاصل کی ہیں ۔
اس موقع پر محکمہ اقلیتی بہبود ‘حج و اوقاف کے سکریٹری محمد محسن آئی اے ایس ‘کے ایم ڈی سی کے منیجنگ ڈائریکٹر صلاح الدین کے اے ایس ‘کرناٹک مائنارٹیز ڈائریکٹوریٹ کے ڈائریکٹر اکرم پاشاہ کے اے ایس ‘وقف بورڈ کے سی ای او جناب ذوالفقار علی او ر دیگر متعلقہ عہدیداران موجودتھے۔