نئی دہلی، 21؍جون(ایس او نیوز؍آئی این ایس انڈیا )کانگریس نے الزام لگایا ہے کہ این ڈی اے حکومت جب جب اقتدار میں آتی ہے، سب سے زیادہ ہندوستان کا کسان، ہندوستان کا محنت کش مزدور اور ہندوستان کا نوجوان پستا ہے۔کانگریس کے ترجمان منیش تیواری نے پریس کانفرنس سے خطاب کرتے ہوئے کہا کہ مدھیہ پردیش میں 2016میں 1600کسانوں نے خود کشی کی تھی،اور2011اور 2015کے درمیان مدھیہ پردیش میں 6ہزار 76کسانوں نے خود کشی کی ہے۔انہوں نے کہا یہ اعداد و شمار ہمارے نہیں، بلکہ نیشنل کرائم ریکارڈ بیورو کے ہیں۔ان برسوں میں مدھیہ پردیش میں بی جے پی کی حکومت تھی اور اب بھی ہے۔گزشتہ دنوں کس طرح 6کسانوں کو اسی صوبہ میں پولیس کی گولیوں سے بھون دیا گیا اور ہندوستان کے وزیر زراعت کو کم ہی بولتے ہیں، انہوں نے بیان دیا ہے کہ کسی ریاست کی حکومت نے کسانوں کے لیے اتنا نہیں کیا جتنا مدھیہ پردیش کی حکومت نے کیا ہے۔اس سے بڑی بے حسی اور کیا ہو سکتی ہے؟انہوں نے کہا ایک طرف تو مدھیہ پردیش اور ہندوستان کے وزیر زراعت ہیں اور دوسری طرف اسی بی جے پی کی راجستھان میں حکومت ہے اور اس راجستھان میں جو فوڈ سیکورٹی قانون ہے ،اس کے تحت جن لوگوں کو قانونی حق کے ذریعہ راشن فراہم کرایا جاتا ہے، ان کے گھر کے باہر راجستھان کی حکومت نے اشتہار پینٹ کروائے ہیں اور اس میں لکھوایا ہے کہ میں انتہائی غریب ہوں اور اس لیے میں حکومت کی چیریٹی کا حقدار ہوں۔