کورگ،20؍اگست(ایس او نیوز)کورگ ضلع تاریخ کے بدترین سیلاب سے بری طرح متاثر ہے، لیکن اس مصیبت کو کچھ لوگوں نے اپنا دھندہ بنانے میں لگے ہوئے ہیں۔

کورگ کے سیلاب متاثرین کی امداد کے نام پر مبینہ دھاندلیوں کے بے نقاب ہونے کے بعد کورگ ضلع کی برادری کوڈوا سماج نے ریاستی حکومت سے مطالبہ کیا ہے کہ کورگیوں کے نام پر عوام سے رقم حاصل کرکے دھاندلی کرنے والوں کے خلاف سخت کارروائی کی جائے ۔

آج ایک اخباری کانفرنس سے خطاب کرتے ہوئے گوڈوا سماج کے ذمہ داروں نے بتایاکہ پدمانابھا نگر کی اسٹیٹ بینک آف انڈیا میں متاثرین کی مدد کے نام پر گوڈوا سماج کی طرف سے ایک فرضی بینک کھاتہ کھولا گیا ہے، اس سلسلے میں اطلاع ملنے کے بعد سماج کی طرف سے فوراً سی سی بی میں شکایت درج کرائی گئی ہے۔

انہوں نے کہاکہ شہر میں گوڈوا سماج کی طرف سے 45ٹرکوں پر مشتمل راحت کاری اشیاء روانہ کی جاچکی ہیں، انہوں نے کہاکہ ضلعی انتظامیہ اور مقامی لوگوں کے مشوروں پر اشیائے ضروریہ کی فہرست مرتب کی گئی ہے۔عوام اس فہرست میں درکار اشیاء ہی روانہ کریں۔

انہوں نے کہاکہ کورگ ضلع میں سرکاری زمینوں پر بے تحاشہ تعمیرات خاص طور پر گھاٹ سیکشن کی دھلانوں پر ماحولیاتی اثرات کی پروا کئے بغیر تعمیرات کی اجازت دئے جانے کے سبب ضلع کو اتنی بڑی مصیبت میں مبتلا ہونا پڑا ہے۔ کوڈوا سماج نے مطالبہ کیا ہے کہ فوری طور پر ضلع میں نئی تعمیرات کی اجازت کا سلسلہ ختم کردیا جائے اور سیلاب وبارش کی وجہ سے جو عمارتیں تباہ ہوئی ہیں صرف ان کی بحالی پر حکومت اپنی توجہ مرکوز رکھے۔