بنگلورو،16؍اکتوبر(ایس او نیوز؍عبدالحلیم منصور) وزیر اعلیٰ سدرامیا نے کہا ہے کہ ان کے خلاف سیاسی حریفوں کا اتحاد ہی ان کیلئے قوت بخش ہے۔ آج میسور میں آر ٹی نگر علاقہ میں موڈا کی طرف سے سائٹوں کی تقسیم کیلئے منعقدہ تقریب سے خطاب کرتے ہوئے سدرامیا نے کہاکہ ان کے حریف کسی بھی حال میں ان کا سیاسی طور پر خاتمہ نہیں کرپائیں گے، کیونکہ ریاستی عوام کا انہیں اعتماد حاصل ہے۔وزیر اعلیٰ نے کہاکہ ان کی کسی سے کوئی ذاتی دشمنی نہیں ہے، لیکن سیاسی محاذ پر ان کے بہت سارے دشمن کام کررہے ہیں، جب سیاسی میدان میں ہیں تو اس طر ح کے دشمنوں کا پایا جانا فطری بات ہے، ان سب دشمنوں سے وہ خوفزدہ ہونے والے نہیں ہیں۔آنے والے اسمبلی انتخابات میں چامنڈیشوری اسمبلی حلقہ سے چناؤ لڑنے کا عزم دہراتے ہوئے سدرامیا نے کہاکہ اس حلقہ نے انہیں دوبارہ سیاسی زندگی دی ہے۔ اسی لئے یہاں کے عوام پر انہیں پورا اعتماد ہے کہ جس طرح پانچ مرتبہ لوگوں نے ان کا ساتھ دیا ، اس بار بھی ان کا ساتھ دیں گے۔ وزیر اعلیٰ نے کہاکہ رواں سال کے اواخر تک موڈا کی طرف سے میسور کے آر ٹی نگر میں پانچ ہزار سائٹیں تقسیم کی جائیں گی۔آج 1683 سائٹیں تقسیم ہوئی ہیں۔ آنے والے دنوں میں مزید سائٹوں کی تقسیم بھی قرعہ کے ذریعہ کی جائے گی۔ وزیر اعلیٰ نے کہاکہ موسلادھار بارش کے سبب شہر بنگلور میں بھاری نقصان پہنچا ہے، لیکن خوش قسمتی سے میسور میں صورتحال اس قدر خراب نہیں ہے۔ شہر میسور میں جتنی بھی بارش ہو نشیبی علاقے زیر آب نہیں آئیں گے، یہاں کے انتظامیہ کی طرف سے یہ قدم اٹھایا جائے گا۔ وزیر اعلیٰ نے اعلان کیا کہ میسور میں یکم جنوری سے 12؍ اندرا کینٹین کھولے جائیں گے، اس کیلئے علاقوں کی نشاندہی کی جاچکی ہے، میسور میں ایسے بارہ علاقہ ہیں جہاں آبادی ایک لاکھ سے زیادہ ہے، ان تمام علاقوں میں ایک ایک اندرا کینٹین قائم ہوگی، اور بیک وقت یہاں پانچ سو افراد کے کھانے کا انتظام کیا جائے گا۔ وزیر اعلیٰ نے کہا کہ ریاستی حکومت کا مقصد یہی ہے کہ ریاست کو بھوک سے آزاد کرایا جائے ۔ ریاست میں کانگریس حکومت اسی مقصد کے تحت ریاست بھر میں ان مقامات پر اندرا کینٹین قائم کرنے کا منصوبہ رکھتی ہے جہاں پر آبادی ایک لاکھ سے زائد ہو۔ ان اندرا کینٹینوں میں شہریوں کو معیاری کھانا پانچ تا دس روپیوں میں مہیا کرایا جائے گا۔ اس موقع پر وزیر شہری ترقیات وحج جناب روشن بیگ ، وزیر برائے تعمیرات عامہ ڈاکٹر ایچ سی مہادیوپا ، وزیر برائے تعلیم واقلیتی بہبودتنویر سیٹھ ، موڈا کے چیرمین دھروا کمار ، رکن اسمبلی ایم کے سوم شیکھر ، رکن کونسل دھرما سینا، سدرامیا کے فرزند ڈاکٹر یتیندرا ، ملیگے ویریش اور دیگر اہم شخصیات موجود تھیں۔