بنگلورو:27/ جولائی(ایس او  نیوز) ریاستی حکومت کی طرف سے برہت بنگلور مہانگر پالیکے کی حدود میں یوم آزادی کے موقع پر بڑے پیمانے پر اندرا کینٹین کی شروعات کرکے یہاں پر پانچ روپیوں میں ناشتہ اور دس روپیوں میں دوپہر اور شام کا کھانا مہیا کرانے کا اعلان کیا گیا ہے ، ایسا نہیں لگتا کہ وہ یوم آزادی تک جامۂ حقیقت پہن پائے گا،کیونکہ برہت بنگلور مہانگر پالیکے نے یوم آزادی تک شہر بھر میں125 اندرا کینٹین قائم کرنے کا اعلان کیاتھا، لیکن ان میں سے صرف 19تا21کینٹین ہی اب تک تعمیر ہوپائے ہیں۔ وزیر اعلیٰ سدرامیا نے کافی توقعات کے ساتھ ان کینٹینوں کی شروعات کا اعلان کیا ، لیکن ان کینٹینوں کیلئے مناسب جگہ مل نہیں پائی، جس کی وجہ سے حکومت کو پشیمانی کا سامنا کرنا پڑ رہا ہے۔ کینٹین کی عمارت قائم کرنے کیلئے بی بی ایم پی اب تک مناسب جگہوں کی نشاندہی میں ناکام رہی ہے۔ کینٹین جو پہلے 198 مقرر کئے گئے تھے اب ان کی تعداد پہلے گھٹا کر128 طے کی گئی تھی، اب یہ کہا جاہارہا ہے کہ 15اگست تک 75کینٹین مکمل کئے جاسکتے ہیں۔اندرا کینٹین کیلئے بیشتر وارڈوں میں زمین ہی نہیں ہے، جس کی وجہ سے سرکاری اسکولوں کی زمینات ، کھیل کے میدان ، پارکوں وغیرہ کی نشاندہی کی جارہی ہے جس پر عوام نے شدید برہمی ظاہر کی ہے۔ قانون کے مطابق ان مقامات پر صرف بیت الخلا اور سیکورٹی روم کے علاوہ کچھ بھی تعمیر نہیں کیا جاسکتا، لیکن ان ضوابط کو قطع نظر کرتے ہوئے بی بی ایم پی اسکولوں ، کالجوں اور سرکاری اسپتالوں کے احاطوں میں اندرا کینٹین تعمیر کرنے کی پہل کرچکی ہے۔ قوانین کو پامال کرکے تعمیر کی گئی اندرا کینٹینوں کو کام کرنے نہ دینے کا بی جے پی نے تہیہ کرلیا ہے اور اس سلسلے میں وہ عنقریب عدالت سے رجوع ہونے کی بھی تیاری میں ہے۔ فی الوقت سرسی وی رامن نگر کے کگداس پورہ کے بھونیشوری نگر ، جیون بیمہ نگر کے منی بال بھون ، پلکیشی نگرکے خوشحال نگر وارڈ میں آنے والے سرکاری اسپتال کے احاطہ میں ، شیواجی نگر اسمبلی حلقہ میں آنے والے السور وارڈ کے ایس این ٹی روڈ پر شیشو وہار کے احاطہ میں وسنت نگر وارڈ میں کنٹونمنٹ ریلوے اسٹیشن سے متصل ، سمپنگی رام نگرم وارڈ نرپتنگا روڈ پر ، بنپا پارک کے قریب چک پیٹ میں جے سی روڈپارکنگ کامپلکس میں چامراج پیٹ حلقہ میں میسور روڈ ویٹرنری اسپتال میں ، شانتی نگر کے جوگو پالیہ وارڈ میں ، ریفرل اسپتال کے قریب ، گاندھی نگر کے کلا پارک اور کھیل کے میدان میں ، بی ٹی ایم پی لے آؤٹ کے کورمنگلا انڈسٹریل لے آؤٹ میں اور بسون گڈی کے جنکے پارک میں اندرا کینٹینوں کی تعمیر کی جارہی ہے۔ اس پر عوام کی طرف سے شدید مزاحمت کا سامنا بھی کرنا پڑ رہا ہے۔