بنگلورو،6؍اکتوبر(ایس او نیوز) الیکشن کمیشن کی طرف سے آج پانچ ریاستوں کے اسمبلی انتخابات کے ساتھ ریاست کے تین لوک سبھا حلقوں ، شیموگہ ،منڈیا اور بلاری اور دو اسمبلی حلقوں جمکھنڈی اور رام نگرم کے ضمنی انتخابات کی تاریخ کے ا علان کے ساتھ ہی ریاستی کابینہ میں ردوبدل ایک بار پھر کھٹائی میں پڑ گیا۔ حالانکہ یہ قیاس کیاجارہاتھا کہ اکتوبر کے دوسرے ہفتے میں دس یا بارہ تاریخ کو وزیر اعلیٰ کمار سوامی اپنی کابینہ میں ردوبدل کردیں گے۔ خود کمار سوامی نے یہ واضح اشارہ دیاتھاکہ کانگریس اعلیٰ کمان کی منظوری اگر ہوتو وہ کابینہ میں ردوبدل کرنے کے لئے تیار ہیں، لیکن اس دوران آج پانچ ریاستوں کے اسمبلی انتخابات کے ساتھ ریاست کے تین لوک سبھااور دو اسمبلی حلقوں کے انتخابات کی تاریخوں کا اعلان کرتے ہوئے الیکشن کمیشن نے انتخابی ضابطے کے نفاذ کردیا۔ یہ انتخابی ضابطہ آج سے لے کر ووٹوں کی گنتی ختم ہونے تک یعنی 15دسمبر تک لاگو رہے گا اور اس مدت کے درمیان ریاستی کابینہ میں ردوبدل کا کوئی امکان نہیں رہا ہے۔ اس دوران ریاستی کابینہ میں ردوبدل کے متعلق آج کمارسوامی نے کانگریس اعلیٰ کمان سے بھی تبادلۂ خیال کیا ، آج دہلی میں وزیراعلیٰ نے صدر کانگریس راہل گاندھی سے ملاقات کی، بتایاجاتاہے کہ اس ملاقات کے دوران راہل گاندھی نے بھی کمار سوامی کو کابینہ میں ردوبدل کے خلاف مشورہ دیا اور کہاکہ فی الوقت کوئی ردوبدل نہ کیا جائے۔ بتایاجاتاہے کہ جے ڈی ایس کا ایک طبقہ بھی ریاستی کابینہ میں توسیع کے خلاف تھا، اور اس طبقے کا ماننا تھاکہ ضمنی انتخابات کے بعد ہی کابینہ میں ردوبدل انجام دیا جائے۔اس دوران الیکشن کمیشن کی طرف سے تاریخوں کے اعلان کے ساتھ وزیراعلیٰ کمار سوامی کو راحت کی سانس لینے کا موقع مل گیا۔ اس دوران بتایاجاتاہے کہ اے آئی سی سی جنرل سکریٹری انچارج کرناٹک وینو گوپال 8؍اکتوبر کو دورۂ بنگلور پر آرہے ہیں ، اس مرحلے میں وہ سابق وزیراعلیٰ سدرامیا، نائب وزیراعلیٰ پرمیشور ، کے پی سی سی صدر دنیش گنڈوراؤ اور دیگر لیڈروں سے تبادلۂ خیال کریں گے۔