خشک سالی سے نمٹنے مرکز فوراً رقم جاری کرے: سدرامیا
بنگلور:17/جنوری(ایس او نیوز) ریاست میں خشک سالی سے نمٹنے کیلئے مرکزی حکومت کی طرف سے جو امدادی رقم جاری کرنے کا اعلان ہوا ہے وہ رقم ابھی ریاست کو نہیں ملی ہے۔ یہ بات آج وزیراعلیٰ سدرامیا نے بتائی۔ اخباری نمائندوں سے بات چیت کرتے ہوئے انہوں نے کہاکہ ریاستی حکومت نے مرکز سے 4702کروڑ روپیوں کی امداد کا مطالبہ کیا تھا لیکن مرکز نے اس میں سے 1787 کروڑ روپے منظور کئے، تاہم اس میں سے اب تک کوئی رقم جاری نہیں کی گئی ہے۔ مرکز سے گذارش کی جائے گی کہ جلد از جلد یہ رقم جاری کی جائے۔ انہوں نے کہاکہ مرکزی حکومت کی طرف سے خشک سالی سے نمٹنے کیلئے جتنی رقم جاری کی جارہی ہے وہ ناکافی ہے، مزید فنڈ جاری کرنے کیلئے وزیر اعظم کو ایک مکتوب روانہ کیاجائے گا۔ انہوں نے کہاکہ حال ہی میں شہر میں منعقدہ پرواسی بھارتیہ دیوس کے موقع پر وزیراعظم نریندر مودی سے انہوں نے خود گذارش کی تھی کہ مزید امداد فراہم کی جائے، لیکن انہوں نے اس پر کوئی جواب نہیں دیا۔ انہوں نے کہاکہ ریاست بھر میں شدید خشک سالی کے سبب حکومت نے خشک سالی سے متاثرہ علاقوں کا سروے اور فصلوں کو ہوئے نقصان کا اندازہ لگانا شروع کردیا ہے۔ اس سلسلے میں تمام تفصیلات یکجا کرنے کے بعد خسارہ کے اعداد وشمار کی بنیاد پر مرکز سے مزید امداد طلب کی جائے گی، اور خشک سالی سے نمٹنے کیلئے مزید سخت قدم اٹھائے جائیں گے۔