بینگلور میں فلیکس اور بیانرس ہٹانے کی مہم تیز؛ بیانر لگانے والوں کے خلاف بلامروت کارروائی: میئر
بنگلورو۔4؍اگست(ایس او نیوز) شہر بھر میں غیر قانونی طور پر لگائے جانے والے فلیکس اور بیانروں کوہٹانے کے لئے برہت بنگلور مہانگر پالیکے کے انتظامیہ کو ہائی کورٹ کی سخت وارننگ کا اثر یہ ہوا کہ پچھلے دو دنوں سے شہر بھر میں جنگی پیمانے پر فلیکس اور بیانرس ہٹانے کا سلسلہ جاری ہے۔ بی بی ایم پی کی طرف سے دئے گئے اعداد وشمار کے مطابق اب تک 25 ہزار سے زائد مقامات سے فلیکس اور بیانر اکھاڑ پھینکے گئے ہیں۔ اس کے ساتھ ہی بی بی ایم پی کی طرف سے فلیکس اور بیانر لگانے والوں کے خلاف مقامی پولیس تھانوں میں ایف آئی آر درج کرنے کا سلسلہ بھی آگے بڑھایا جارہا ہے۔
شہر کے میئر سمپت راج نے کہا کہ منظوری کے بغیر شہر بھر میں جن لوگوں نے بھی فیکس اور بیانرس لگائے ہیں ان کی فہرست تیار کی جائے اور فلیکس اور بیانرس ہٹائے جانے کے بعد ان کے خلاف کارروائی کی پہل انہیں ایک واٹس اپ پیغام کے ذریعے کی جائے۔ساتھ ہی جس علاقے سے فلیکس اور بیانر ہٹایا گیا ہے وہاں عہدیدار سے دریافت کیاجائے کہ اس بیانر کو ہٹانے کے لئے کارروائی پہلے کیوں نہیں کی گئی ، اگر وہ جواب نہ دے پایا تو اس کے خلاف بھی کارروائی کی جائے۔ میئر نے ورتور علاقے میں فلیکس اور بیانر ہٹائے نہ جانے کی شکایت ملنے کے بعد بی بی ایم پی میں حکمران پارٹی لیڈر ایم شیوراج کے ہمراہ ورتور کا دورہ کیا اور بذات خود فلیکس اور بیانرس ہٹانے کی مہم شروع کرنے کے ساتھ اس مہم کے متعلق لاپروائی برتنے والے افسروں کو آڑے ہاتھوں لیا۔
شہر کے کرشنا راج پورم کے قریب ٹن فیکٹری علاقے میں فلیکس اور بیانر ہٹانے بی بی ایم پی کی کارروائی کے دوران افسروں اور عملے پر کچھ شر پسندوں کے حملوں کی اطلاع پاکر میئر نے وہاں کا بھی دورہ کیا اور یہاں ہنگامہ آرائی کے باوجود بھی فلیکس اور بیانر ہٹائے جانے پر انہوں نے عملے کو مبارکباد دی۔انہوں نے کہاکہ بی بی ایم پی نے شہر میں جو منظور شدہ ہورڈنگس مقرر کئے ہیں ان کے علاوہ کہیں فلیکس یا بیانر نظر آئے تو اسے بلامروت ہٹادیا جائے۔ یہ خاطر میں نہ رکھا جائے کہ فلیکس اور بیانر میں جس شخصیت کی تصویر ہے اس کا سیاسی اثر ورسوخ کیا ہوگا۔ عدالت کے حکم کے مطابق فلیکس اور بیانر ہٹانے کی کارروائی بلامروت ہونی چاہئے۔ انہوں نے بی بی ایم پی افسروں اور عملے سے کہا کہ وہ بے خوف وخطر اس مہم کا حصہ بنیں اور شہر کو بدنما فلیکس اور بیانروں سے پاک کرکے شہر کی خوبصورتی بحال کی جائے۔ اس مہم کوآگے بڑھانے میں بی بی ایم پی کی طرف سے ہر ممکن مدد دی جائے گی۔
