بنگلورو،21؍فروری(ایس او نیوز)ریاستی وزیر برائے آبی وسائل ایم بی پاٹل نے کہا کہ شہر بنگلور میں پانی کی شدید قلت کو دیکھتے ہوئے ریاستی حکومت نے کرشنا راجہ ساگر ڈیم کے ڈیڈ اسٹوریج کے دو تا تین ٹی ایم سی فیٹ پانی کو استعمال میں لانے پر غور کرنا شروع کردیا ہے ۔ آج اخباری نمائندوں سے بات چیت کرتے ہوء یانہوں نے کہاکہ شہر بنگلور میں پانی کی قلت کے معاملے سے بی ڈبلیو ایس ایس بی کو آگاہ کرایا جاچکا ہے، اور یہ ہدایت دی گئی ہے کہ عوام میں پانی کو احتیاط سے استعمال کرنے کے متعلق فوری طور پر بیدار ی مہم چلائی جائے۔ انہوں نے کہاکہ فی الوقت کاویری طاس کے کرشنا راجہ ساگر اور کبنی ڈیم میں ڈیڈ اسٹوریج کا پانی بنگلور کیلئے استعمال کرنے پر غور کیا جارہا ہے۔ اس پر چالیس کروڑ روپیوں کا خرچ آئے گا۔ انہوں نے کہاکہ دونوں آبی ذخائرمیں تقریباً پانچ ٹی ایم سی فیٹ پانی ڈیڈ اسٹوریج سے ملنے کی توقع ہے۔ اگر اس پانی کو استعمال کیا جائے گا تو فوری طور پر بنگلور میں پانی کی قلت سے نمٹا جاسکتا ہے، لیکن آنے والے دنوں میں پانی کا مسئلہ اور پیچیدہ ہوسکتا ہے۔ انہوں نے کہاکہ حکومت نے پینے کے پانی کی قلت کو دیکھتے ہوئے زرعی سرگرمیوں کیلئے کاویری سے پانی کی فراہمی معطل کردی ہے۔