ہبلی،16؍جولائی(ایس او نیوز) سابق وزیراعظم وجنتادل سکیولر کے قومی صدر ایچ ڈی دیوے گوڈا نے بتایاکہ آنے والے پارلیمانی اور ضلع وتعلقہ پنچایت انتخابات کے لئے پارٹی کو تیار اور منظم کرنے کے مقصد کے تحت ہبلی کے دورہ پر آئے ہیں۔

یہاں ایک اخباری کانفرنس سے خطاب کرتے ہوئے دیوے گوڈا نے اس خیال کا اظہار کیااور کہاکہ گزشتہ اسمبلی انتخابات میں شمالی کرناٹک علاقہ میں جنتادل سکیولر کو حسب توقع نتائج نہیں ملے۔

انہوں نے بتایاکہ ایچ ڈی کمار سوامیپر اب وزیراعلیٰ کی ذمہ داری ہے اور انہیں وقت نہیں ملتا۔ اس لئے ریاستی دورہ کرکے پارٹی کو منظم کرنے کی کوشش کریں گے۔ انہوں نے بتایاکہ تیسرے محاذ کا قیام ابھی نہیں ہواہے۔ این ڈی اے کے علاوہ تمام رہنما بنگلور میں اکٹھا ہوئے۔ ملک کی چند ریاستوں میں علاقائی پارٹیوں کی طاقت زیادہ ہے جبکہ دیگر چند ریاستوں میں صرف کانگریس اور بی جے پی پارٹیاں ہیں۔ پارلیمانی انتخابات سے پہلے یا بعد چند پارٹیوں کے درمیان اتحاد ہوسکتاہے۔ ایک سوال کے جواب میں دیوے گوڈا نے بتایاکہ شیوسینا اور بی جے پی کے درمیان اتحاد ابھی واضح نہیں ہواہے۔

انہوں نے کہاکہ ریاستی بجٹ میں شمالی کرناٹک کے ساتھ ناانصافی نہیں ہوئی ہے۔ ان کے دور میں اس علاقہ کی ترقی ہوئی، سدارامیا جس وقت وزیراعلیٰ تھے شمالی کرناٹک کے لئے کتنے وزراء دیئے ہیں۔ انہوں نے بتایاکہ لسانی صوبوں کے بعد شمالی کرناٹک کے لئے کتنی رقم جاری ہوئی ہے۔ اس کا حساب طلب کیا جائے گا۔ اس موقع پر جنتادل سکیولر کے قومی جنرل سکریٹری ظفراﷲ خان اور دیگر مقامی رہنما موجود رہے۔