طالبات صرف بات نہیں بلکہ اپنے عمل سے اپنی صلاحیت کو ثابت کریں: جنرل ضمیر الدین شاہ
علی گڑھ:24/مارچ (ایس او نیوز/آئی این ایس انڈیا) علی گڑ ھ مسلم یونیورسٹی کے وائس چانسلر لیفٹیننٹ جنرل ضمیر الدین شاہ نے فیڈریشن آف علی گڑھ الیومنائی ایسو سی ایشن، یو ایس اے کے تعاون سے ویمنس کالج میں قائم کوچنگ اینڈ گائڈئینس سیل کا افتتاح کرتے ہوئے طالبات سے کہا کہ وہ صرف بات ہی نہیں بلکہ اپنے عمل سے اپنی صلاحیت کو ثابت کریں۔ جنرل شاہ نے کہا کہ کسی بھی کیریئر کا انتخاب کرنے سے قبل اس امر کو یقینی بنالینا چاہئے کہ ان کی دلچسپی بھی اس میدان میں ہو۔ وائس چانسلر نے غلطیوں سے سیکھ کر ایک ٹیم پلیئر بننے اور وقت کا صحیح استعمال کرتے ہوئے تکنیک کی مدد مثلاً”کنڈل“ کا استعمال کرکے زیادہ سے زیادہ کتب کے مطالعہ کا مشورہ دیا۔اس موقعہ پر فیڈریشن آف علی گڑھ الیومنائی ایسو سی ایشن(ایف اے اے اے)، یو ایس اے کی نمائندہ اور عبداللہ کالج کی سابق طالبہ ڈاکٹر سعدیہ چغتائی نے اپنے دورِ طالب علمی کی یادوں کو تازہ کرتے ہوئے اپنی کامیابی کا سہرا یہاں کے اساتذہ کے سر باندھتے ہوئے کہا کہ پختہ اعتماد اور مسلسل محنت سے کسی بھی ہدف کو حاصل کیا جاسکتا ہے۔انہوں نے فیڈریشن آف علی گڑھ الیومنائی ایسو سی ایشن یو ایس اے کے طریقہئ کار اور یتیم بچوں کی تعلیم کی سمت میں کی جارہی کاوشوں کی مختصر تفصیلات پیش کیں۔