بنگلورو،18؍دسمبر، (ایس او نیوز) معروف صنعت کار ریلائنس گروپ کے سربراہ مکیش امبانی کی دختر کی شادی میں ریاستی وزیر برائے آبی وسائل ڈی کے شیوکمار کی شرکت کو سیاسی رنگ دیتے ہوئے بی جے پی نے ان کے استعفے کا مطالبہ کیا ہے۔
بی جے پی کے ریاستی قائدین نے یہ حوالہ دیتے ہوئے ایک طرف صدر کانگریس راہل گاندھی ہر دن ریلائنس گروپ کے سربراہوں امبانی کو برا بھلا کہتے ہیں تو دوسری طرف انہیں کی پارٹی سے وابستہ ڈی کے شیوکمار نے امبانی کی دخترکی شادی میں شرکت کی ہے اس بارے میں راہل گاندھی کو سخت نوٹس لیتے ہوئے ڈی کے شیوکمار کو وزارت سے برطرف کردینا چاہئے۔
بی جے پی کے ترجمان پرکاش نے کہا ہے کہ ایک طرف راہل گاندھی ہر بار امبانی پر چوری کا الزام لگاتے ہیں تو دوسری طرف ان لوگوں کے ساتھ ڈی کے شیوکمار دکھائی دے رہے ہیں جن کو راہل گاندھی چور کہتے ہیں۔ امبانی کا حوالہ دے کر بارہا راہل گاندھی وزیر اعظم مودی کو نشانہ بناتے ہیں اب جو تصاویر میڈیا پر چھائی ہوئی ہیں ان میں ڈی کے شیوکمار امبانی کے گلے لگ رہے ہیں۔
صدر کانگریس کو بتانا چاہئے کہ اس بارے میں ان کی کیا رائے ہے۔ امبانی کو رافیل جنگی طیارے کا ٹھیکہ دئے جانے کو بنیاد بناکر بارہا مرکزی حکومت پر نکتہ چینی کی جارہی ہے۔ اب راہل گاندھی کی نظروں میں جو لٹیرے ہیں ان کے ساتھ ڈی کے شیوکمار نظر آرہے ہیں ۔ راہل گاندھی کو بتانا چاہئے کہ ڈی کے شیوکمار امبانی کی تقریب میں کیوں گئے؟۔
راہل گاندھی نے یہ الزام بھی لگایا ہے کہ بنگلور کی ایک کمپنی ایچ اے ایل سے رافیل کا ٹھیکہ چھین کر مرکزی حکومت نے انیل امبانی کی ناتجربہ کار کمپنی کے حوالے کردیا ہے، اس معاملے میں رشوت خوری کا الزام بھی لگایا جارہاہے۔ پرکاش نے کہاکہ سپریم کورٹ نے اس معاملے میں مرکزی حکومت کو کلین چٹ دے دی ہے۔ اگر واقعی رافیل سودے میں گھپلہ ہوا ہے تو راہل گاندھی کو چاہئے کہ الزام تراشیوں کی بجائے ثبوت پیش کریں۔