گلبرگہ28مئی(ایس او نیوز) ریاستی کانگریس حکومت کی تعریف کے پل باندھتے ہوئے اورحکومت کی جانب سے جاری کئی ایک اسکیموں کا تذکرہ کرتے ہوئے رکن قانون سازکونسل کرناٹک،و سابق ایم پی ممتاز کانگریسی قائد ،ماہر تعلیم و دانشورالحاج اقبال احمد سرڈگی نے کہا کہ  اس سال کے ریاستی حکومت کے بجٹ سے بھی کرناٹک کے عوام کافی حد تک مطمئن ہیں۔ اقبال احمد سرڈگی نے ایک سوال کے جواب میں کہا کہ  چیف منسٹر اتر پردیش یوگی آدتیہ ناتھ کے انتخابی دورہ کرناٹک سے بی جے پی کو کوئی فائیدہ نہیں ہوگاکیوں کہ ابھی انھیں چیف منسٹربن کرچنددن ہی گزرے ہیں کہ اتر پردیش میں کافی گڑبڑشروع ہوگئی ہے ،عوامی طبقات میں کافی ہلچل مچی ہوئی ہے۔اتر پردیش میں دلتوں اورمسلمانوں کے ساتھ اچھا سلوک نہیں ہورہاہے۔دلتوں اورمسلمانوں پرظلم ڈھائے جارہے ہیں۔لیکن حکومت ان مظالم اور زیادتیوں کے خلاف کوئی قدم نہیں اٹھارہی ہے ۔ ایسے حالات میں جب کہ خود اترپردیش کے لوگ بی جے پی کی قیادت سے مطمئین نہیں ہیں وہاں کے چیف منسٹرکرناٹک کا انتخابی دورہ کرکے کیا کرسکیں گے۔ یہاں کے لوگ کیسے ان کی باتوں پر اعتمادکریں گے  ؟

الحاج اقبال احمدسرڈگی کے مطابق کرناٹک میں جنتا دل سیکولر اور کانگریس کے مابین انتخابی اتحاد کے بارے میں کوئی بات واضح نہیں ہوسکی ہے۔ کانگریس ہائی کمان ہی اس کا فیصلہ کرسکتی ہے۔ اضلاع گلبرگہ،بیدر،رائچور،کوپل،یادگیر اور بلاری پرمشتمل علاقہ حیدر آبادکرناٹک کی ترقی سے متعلق پوچھے گئے ایک سوال کاجواب دیتے ہوئے الحاج اقبال احمدسرڈگی نے کہا کہ رکن پارلیمینٹ،گلبرگہ و سابق مرکزی وزیر ڈاکٹر ملیکارجن کھرگے کی ذاتی دلچسپی اور بھر پور توجہ دینے کے سبب عرصہ دراز سے پس ماندہ علاقہ حیدر آباد کرناٹک میں کافی نمایاں تبدیلیاں ہوئی ہیں ۔

ڈاکٹر کھرگے صاحب کے کارناموں کو عو ام نہایت قدر کی نگاہ سے دیکھ رہے ہیں ۔ سب سے پہلے تو یہ کہ علاقہ حیدر آبادکرناٹک کی تاریخی پسماندگی کے لئے ڈاکٹر ملیکارجن کھرگے نے اپنی سیاسی تجربہ کاری ، دور اندیشی اور زبردست حکمت سے کام لیتے ہوئے اس علاقہ کو خصوصی مراعات دلانے ، یہاں کے روزگار اور تعلیم کے میدانوں میں پسماندی کوختم کروانے کے لئے مرکزی حکومت سے زبردست نمائیندگی کی اور اپنے سیاسی رفقاء سابق چیف منسٹر دھرم سنگھ وغیرہ کے ساتھ مل کر پارلیمینٹ میں علاقہ حیدر آبادکرناٹک کے لئے خصوصی مراعات فراہم کرنے کے ضمن میں دستورہندکی ترمیمی دفعہ 371 J منظور کروائی ۔ڈاکٹر کھرگے کایہ اتنا بڑاکارنامہ ہے کہ یہاں کے عوام اسے کبھی فراموش نہیں کرسکیں گے ۔