بنگلورو،27؍فروری(ایس او نیوز)سابق وزیر اعلیٰ اور ریاستی بی جے پی صدر بی ایس یڈیورپا نے کہاکہ کانگریس اعلیٰ کمان کو بھاری رقم ادا کئے جانے کے متعلق رکن کونسل گووند راج کے گھر سے جو ڈائری بر آمد ہوئی ہے، ریاستی حکومت فوری طور پر اس کی سی بی آئی جانچ کرائے۔ نہ صرف گووند راج کی ڈائری بلکہ بی جے پی رکن کونسل لہر سنگھ کے گھر سے ضبط شدہ ڈائری کی بھی سی بی آئی کے ذریعہ جانچ کرائی جانی چاہئے۔ اخباری نمائندوں سے با ت چیت کرتے ہوئے یڈیورپا نے کہاکہ مرکزی حکومت سے انہوں نے بھی یہ گذارش کی ہے کہ اس ڈائری کی سی بی آئی کے ذریعہ جانچ کرائی جائے۔ یہ دعویٰ کرتے ہوئے کہ آنے والے دنوں میں بی جے پی ریاست کے اقتدار پر قبضہ کرے گی،یڈیورپا نے کہاکہ اقتدار سنبھالتے ہی وہ ریاست کے تمام کسانوں کے قرضہ جات معاف کردیں گے۔انہوں نے کہاکہ بی جے پی حکومت نے اس سے پہلے دومرتبہ کسانوں کے قرضہ جات معاف کئے ہیں۔ 2018کے اسمبلی انتخابات میں بھی پارٹی اسی وعدہ کے ساتھ ووٹ طلب کرے گی۔ یڈیورپا نے کہاکہ وزیر اعلیٰ سدرامیا کی طرف سے 15مارچ کو جو بجٹ پیش ہونے جارہا ہے اس میں اگر انہوں نے کسانوں کے قرضہ جات معاف کرنے کا اعلان نہیں کیا تو ان کے خلاف تحریک میں مزید شدت لائی جائے گی۔ انہوں نے کہاکہ حکومت کی طرف سے کسانوں کے قرضہ جات معاف کرنے میں کسی طرح کی مالی رکاوٹ درپیش نہیں ہے۔ انہوں نے کہاکہ ہر بات کیلئے ریاستی حکومت کی طرف سے غیر ضروری طور پر مرکز کو ذمہ دار ٹھہرایا جاتا ہے۔ اس بار کسانوں کے قرضہ جات معاف کرنے کیلئے مرکز سے رقم کی ضرورت نہیں، بلکہ ریاستی حکومت کے پاس ہی اتنے وسائل موجود ہیں کہ وہ اپنے طور پر رعیتوں کے قرضہ جات معاف کرسکتی ہے۔ کانگریس اعلیٰ کمان کو مبینہ رشوت کے معاملے میں یڈیورپا نے کہاکہ وزیر اعلیٰ سمیت کانگریس کے بیشتر لیڈر پچھلے تین دن سے روپوش ہوچکے ہیں ، اس سلسلے میں عوام اور میڈیا کی طرف سے اٹھنے والے سوالات کا جواب دینے کی طاقت ان لوگوں میں نہیں ہے۔ یڈیورپانے کہاکہ اس معاملے کی سچائی جب تک عوام کے سامنے نہیں آجاتی بی جے پی اپنی احتجاجی تحریک جاری رکھے گی۔