بنگلورو20؍دسمبر(ایس او نیوز) ریاستی لیجسلیٹیو کونسل کے ڈپٹی چیرمین کے طور پر آج جے ڈی ایس کے ایس ایل دھرمے گوڈا بلامقابلہ منتخب ہوگئے۔آج جیسے ہی کارروائی شروع ہوئی چیرمین پرساد چندر شٹی نے ڈپٹی چیرمین کے انتخاب کی کارروائی کا آغاز کیا اور کہا کہ بسوراج ہوراٹی ، کے ٹی سری کنٹے گوڈا، این اپاجی گوڈا کی تائید سے ایس ایل دھرمے گوڈا نے ڈپٹی چیرمین کے عہدے کے لئے پرچۂ نامزدگی داخل کیا ہے ، چونکہ ان کے علاوہ کسی اور نے پرچہ داخل نہیں کیا اسی لئے ایوان کے ڈپٹی چیرمین کے طور پر ایس ایل دھرمے گوڈا اتفاق رائے سے چنا گیا ہے۔ان کے انتخاب پر حکمران اور اپوزیشن اراکین نے ڈپٹی چیرمین کو مبارکباد دی۔ ایوان بالا کی لیڈر جئے مالا نے مبارکباد دیتے ہوئے کہاکہ وہ ایوان کے اصولوں کو بالاتر رکھتے ہوئے کام کریں گے۔اپوزیشن لیڈر کے سرینواس پجار نے بھی ڈپٹی چیرمین کو اپوزیشن کی طرف سے بھرپور تعاون کا یقین دلایا۔ وزیر صنعت کے جے جارج نے بھی انہیں مبارکباد دی۔ دیگر تمام ممبروں نے اپنے اپنے تاثرات ظاہر کرتے ہوئے ڈپٹی چیرمین کو مبارکباد پیش کی۔